എടപ്പാള്‍: പൊന്നാനി ആര്‍.ടി.ഒ അജിത്ത് കുമാറിന്റെ നേതൃത്വത്തില്‍ സംസ്ഥാന പാതയില്‍ നടത്തിയ പരിശോധനയില്‍ അന്‍പതോളം വാഹനങ്ങള്‍ പിടികൂടി പിഴയിട്ടു. വ്യാഴാഴ്ച്ച രാത്രിയില്‍ എടപ്പാള്‍ ചങ്ങരംകുളം മേഖലയില്‍ സംസ്ഥാന പാതയില്‍ നടത്തിയ പരിശോധനയിലാണ് വാഹനങ്ങള്‍ പിടിയിലായത്.
നിരോധിച്ച ലൈറ്റ് സ്ഥാപിച്ച വാഹനങ്ങള്‍, രേഖകള്‍ ഇല്ലാത്ത വാഹനങ്ങള്‍,ഓവര്‍ ലോഡുള്ള വാഹനങ്ങള്‍ തുടങ്ങിയവ പിടിയിലായവയില്‍ പെടുന്നു.
പരിശോധനയില്‍ കാലാവധി കഴിഞ്ഞ ലൈസന്‍സ് ഉപയോഗിച്ച് ഡ്രൈവിങ്ങ് നടത്തിവന്ന ദീര്‍ഘ ദൂര ബസ്സ് ഡ്രൈവറെ കസ്റ്റഡിയിലെടുത്തു. തൃശ്ശൂര്‍-കോഴിക്കോട് റൂട്ടില്‍ സര്‍വീസ് നടത്തുന്ന സ്വകാര്യ ബസ് ഡ്രൈവറാണ് പിടിയിലായത്. വരും ദിവസങ്ങളില്‍ പരിശോധന കര്‍ശനമാക്കുമെന്ന് അധികൃതര്‍ അറിയിച്ചു.