ബെയ്ജിങ്: കൊറോണ വൈറസ് വ്യാപനവും മരണവും ദിനംപ്രതി കൂടിവരുന്നതിനിടെ ചൈനയില്‍ കൊറോണ പുതുതായി ബാധിക്കുന്നവരുടെ എണ്ണം കുറഞ്ഞു തുടങ്ങി. ഇതാദ്യമായി പുതുതായി രോഗബാധ സ്ഥിരീകരിച്ചവരുടെ എണ്ണം 2,000ത്തിനു താഴെയെത്തി. 1,886 പേര്‍ക്കാണ് വൈറസ് ബാധ കഴിഞ്ഞദിവസം സ്ഥിരീകരിച്ചത്.
ഇതില്‍ കൂടുതലും ഹുബൈയിലാണ്. രാജ്യത്ത് ഇതുവരെ 72,436 പേര്‍ക്കാണ് രോഗം ബാധിച്ചത്. അതേസമയം കൊറോണ വൈറസ് ബാധിച്ചുള്ള ആകെ മരണം 1,868 ആയി. ഹുബൈയില്‍ തിങ്കളാഴ്ച 93 പേര്‍ മരിച്ചു. വുഹാനിലെ വുച്ചാങ് ആശുപത്രിയുടെ ഡയരക്ടര്‍ ലിയു സിമിങ്ങും ഇതില്‍ ഉള്‍പ്പെടും. ഇതുവരെ രാജ്യത്ത് 1,716 ആരോഗ്യ പ്രവര്‍ത്തകരെ വൈറസ് ബാധിച്ചിട്ടുണ്ട്. ഇതില്‍ അഞ്ചുപേര്‍ മരിച്ചു.