ശ്രീനഗര്‍: ബോട്ടപകടത്തില്‍പ്പെട്ടവരെ രക്ഷപ്പെടുത്തി കശ്മീരിലെ ഝലം നദിയില്‍ കാണാതായ ഗുലാംമുഹമ്മദിന്റെ മൃതദേഹം കണ്ടെത്തി. കാണാതായി ആറുദിവസത്തിനു ശേഷമാണ് അദ്ദേഹത്തിന്റെ മൃതശരീരം കണ്ടെത്തിയത്. വിനോദയാത്രയ്‌ക്കെത്തിയവരുടെ ബോട്ട് പുഴയില്‍ മുങ്ങുന്നതു കണ്ട് അവരെ രക്ഷിക്കാനിറങ്ങിയ ഗുലാം മുഹമ്മദിനെ പുഴയില്‍ കാണാതാവുകയായിരുന്നു.

അന്‍പതുകാരനായ ഇദ്ദേഹത്തിനായുള്ള തെരച്ചില്‍ ദിവസങ്ങളായി നടന്നുവരികയായിരുന്നു. മൃതദേഹം ഇന്നലെ ഉച്ചയോടെ കുടുംബത്തിന് കൈമാറി. മരണത്തില്‍ കശ്മിര്‍ മുഖ്യമന്ത്രി മെഹ്ബൂബ മുഫ്തി അനുശോചിച്ചു. ആരാണ് കശ്മീരിയെന്നു ഗുലാം തന്റെ പ്രവൃത്തിയിലൂടെ കാണിച്ചെന്ന് അവര്‍ പറഞ്ഞു. അദ്ദേഹത്തിന്റെ കുടുംബത്തെ അനുശോചനം അറിയിച്ച മുഖ്യമന്ത്രി അവര്‍ക്കു വേണ്ടതെല്ലാം സര്‍ക്കാര്‍ ചെയ്യുമെന്നും പറഞ്ഞു. കഴിഞ്ഞ ബുധനാഴ്ച രാത്രിയാണ് രണ്ടു കുട്ടികളടങ്ങുന്ന ആറംഗ വിനോദയാത്രാസംഘം കശ്മീരിലെ ഝലം നദിയില്‍ അപകടത്തില്‍പ്പെട്ടത്. യാത്രക്കാരെ എല്ലാവരെയും രക്ഷിച്ചെങ്കിലും അവരുടെ ലഗേജ് തിരിച്ചെടുക്കുന്നതിനിടെ ഗുലാംമുഹമ്മദിനെ കാണാതാവുകയായിരുന്നു.