തിരുവനന്തപുരം: വെടിയുണ്ടകള്‍ കാണാതായ സംഭവത്തില്‍ തിരുവനന്തപുരം എസ്.എ.പി ക്യാംപില്‍ ക്രൈംബ്രാഞ്ച് പരിശോധന. ഒഴിഞ്ഞ കെയ്‌സുകള്‍ ഉരുക്കി പാത്രങ്ങളും എംബ്ലവും ഉണ്ടാക്കിയെന്ന വിവരത്തിന്റെ അടിസ്ഥാനത്തിലായിരുന്നു പരിശോധന.
കെയ്‌സുകള്‍ ഉരുക്കി നിര്‍മിച്ചെന്നുകരുതുന്ന എംബ്ലം ക്രൈംബ്രാഞ്ച് കസ്റ്റഡിയിലെടുത്തു. പിച്ചളയില്‍ നിര്‍മിച്ച മുദ്രയാണ് പിടിച്ചെടുത്തത്. 350 വ്യാജ കാറ്റ്‌റിഡ്ജുകളും ക്രൈംബ്രാഞ്ച് പിടിച്ചെടുത്തിട്ടുണ്ട്. നഷ്ടപ്പെട്ട വെടിയുണ്ടകള്‍ക്ക് പകരമാണ് വ്യാജ കാറ്റ്‌റിഡ്ജ് ഉണ്ടാക്കിയത്. വ്യാജ കാറ്റ്‌റിഡ്ജ് ഉണ്ടാക്കിയത് ഗുരുതര കുറ്റകൃത്യമാണെന്ന് ക്രൈംബ്രാഞ്ച് ഉദ്യോഗസ്ഥര്‍ പറഞ്ഞു.
വെടിയുണ്ടകള്‍ കാണാതായ സംഭവത്തില്‍ 11 പൊലിസുകാരാണ് പ്രതിസ്ഥാനത്തുള്ളത്. ഇവരോട് ക്രൈംബ്രാഞ്ച് ആസ്ഥാനത്ത് ഹാജരാകാന്‍ അന്വേഷണസംഘം നിര്‍ദേശിച്ചിട്ടുണ്ട്.