ന്യൂഡല്‍ഹി: രാജ്യത്തെ മെഡിക്കല്‍ കോളജുകളിലേക്കുള്ള ബിരുദ,ബിരുദാനന്തര കോഴ്‌സുകളിലേക്കുള്ള ഏകീകൃത പൊതുപ്രവേശനപ്പരീക്ഷയായ നീറ്റ് ഉറുദുഭാഷയില്‍ കൂടി എഴുതാനുള്ള അവസരം വേണമെന്നാവശ്യപ്പെട്ട ഹരജിയില്‍ സുപ്രിം കോടതി മെഡിക്കല്‍ കൗണ്‍സില്‍ ഓഫ് ഇന്ത്യ, ഡല്‍ഹി കൗണ്‍സില്‍ ഓഫ് ഇന്ത്യ, സി.ബി.എസ്.ഇ എന്നിവയ്ക്ക് നോട്ടിസ് അയച്ചു. എസ്.ഐ.ഒ നല്‍കിയ ഹരജിയില്‍ ജസ്റ്റിസുമാരായ കൂര്യന്‍ ജോസഫ്, ആര്‍.ഭാനുമതി എന്നിവരടങ്ങിയ ബെഞ്ചിന്റേതാണ് നടപടി.
നിലവില്‍ എട്ടുഭാഷയിലാണ് നീറ്റ് പരീക്ഷ എഴുതാവുന്നത്. ഇതില്‍ നിന്ന് ഉറുദുവിനെ ഒഴിവാക്കിയത് ഭരണഘടനയുടെ14, 21 വകുപ്പുകളുടെ ലംഘനമാണെന്ന് ഹരജിക്കാര്‍ക്കു വേണ്ടി ഹാജരായ രവീന്ദ്ര എ.എസ് ഗാരിയ ചൂണ്ടിക്കാട്ടി. ഇന്ത്യയില്‍ ഏറ്റവും കൂടുതല്‍ പേര്‍ സംസാരിക്കുന്ന ആറാമത്തെ ഭാഷയാണ് ഉറുദു.
ഇത് ഒഴിവാക്കിയാണ് ഏഴാമത്തെ വലിയ ഭാഷയായ ഗുജറാത്തിയെ ഉള്‍പ്പെടുത്തിയിരിക്കുന്നത്. 12മത്തെ ഭാഷയായ അസമീസും നീറ്റ് എഴുതാവുന്ന ഭാഷയുടെ പട്ടികയിലുണ്ട്. ഇതു ഉര്‍ദു ഭാഷയോടുള്ള നഗ്നമായ വിവേചനമാണ്. ഉറുദു ഉള്‍പ്പെടുത്തണമെന്ന് തെലങ്കാനയും മഹാരാഷ്ട്രയും ഔദ്യോഗികമായി ആവശ്യപ്പെട്ടിട്ടുണ്ടെന്നും ഹരജിക്കാര്‍ ആവശ്യപ്പെട്ടു. വാദം കേട്ട കോടതി ബന്ധപ്പെട്ടവരുടെ അഭിപ്രായമാരാഞ്ഞ് അവര്‍ക്കു നോട്ടിസയക്കുകയായിരുന്നു. മെയ് ഏഴിന് നടക്കുന്ന നീറ്റ് പരീക്ഷയിലേക്ക് അപേക്ഷ സമര്‍പ്പിക്കേണ്ട തിയതി ഈ മാസം ഒന്നിന് അവസാനിച്ചിട്ടുണ്ട്.