ഷാർജ: യുഎഇയിലെ ഷാർജ എമിറേറ്റിലെ അൽ ധൈദ്, സുഹൈല മേഖലകളിൽ ഇന്ന് ഉച്ചയ്ക്ക് കനത്ത മഴയും ഇടിമിന്നലും. ശക്തമായ മഴയെ തുടർന്ന് അൽ ധൈദിനും സമീപ പ്രദേശങ്ങളിലുമുള്ള വാദികളിൽ വെള്ളം കുത്തിയൊഴുകി. 

രാജ്യത്തിന്റെ കിഴക്കൻ മേഖലകളിൽ സംവഹന മേഘങ്ങൾ (Convective Clouds) രൂപപ്പെടുമെന്നും ചിലയിടങ്ങളിൽ ശക്തമായ മഴയ്ക്ക് സാധ്യതയുണ്ടെന്നും യുഎഇ ദേശീയ കാലാവസ്ഥാ കേന്ദ്രം (NCM) നേരത്തെ മുന്നറിയിപ്പ് നൽകിയിരുന്നു. ഇന്ന് വൈകിട്ട് 7 മണിവരെ നേരിയതോ മിതമായതോ ആയ മഴയും ചിലയിടങ്ങളിൽ കനത്ത മഴയും ലഭിക്കുമെന്നായിരുന്നു പ്രവചനം.

സാമൂഹിക മാധ്യമങ്ങളിൽ പ്രചരിച്ച ദൃശ്യങ്ങളിൽ അൽ ധൈദ് മേഖലയിൽ കനത്ത മഴയും ശക്തമായ ഇടിമിന്നലും കാണാം. മഴയെ തുടർന്ന് ചില വാടികളിൽ വെള്ളം ശക്തമായി ഒഴുകുന്നതും ദൃശ്യങ്ങളിൽ വ്യക്തമാണ്.

അതേസമയം, രാജ്യത്തിന്റെ മറ്റ് ഭാഗങ്ങളിൽ പൊതുവെ തെളിഞ്ഞ കാലാവസ്ഥയാണ് അനുഭവപ്പെട്ടത്. കിഴക്കൻ മേഖലകളിൽ രാവിലെ താഴ്ന്ന മേഘങ്ങൾ രൂപപ്പെടുകയും താപനിലയിൽ നേരിയ കുറവ് രേഖപ്പെടുത്തുകയും ചെയ്തു.

ഇന്ന് രാത്രി മുതൽ നാളെ രാവിലെ വരെ തീരദേശ, ഉൾനാടൻ പ്രദേശങ്ങളിൽ ഈർപ്പമുള്ള കാലാവസ്ഥ തുടരുമെന്നും മൂടൽമഞ്ഞിനും നേരിയ മഞ്ഞിനും സാധ്യതയുണ്ടെന്നും എൻസിഎം മുന്നറിയിപ്പ് നൽകി.

English summary : Heavy rain swept across Al Dhaid and Suhaila in Sharjah on Saturday afternoon, with reports of flowing wadis and intense downpours after the UAE's National Center of Meteorology (NCM) warned of convective cloud activity across parts of the country's east.

The NCM had forecast the development of convective clouds accompanied by light to moderate rainfall, with the possibility of heavy showers in some areas until 7pm. on Saturday.