കോഴിക്കോട്: സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് 10000 മദ്‌റസകള്‍ക്ക് അംഗീകാരം നല്‍കിയതിന്റെ ഭാഗമായി കോഴിക്കോട് കടപ്പുറത്തെ മറൈന്‍ ഗ്രൗണ്ടില്‍ ഒരുക്കുന്ന 'ദ ഹെരിറ്റേജ്' ദൃശ്യാവിഷ്‌കാരത്തില്‍ സുപ്രഭാതത്തിന്റെ പ്രദര്‍ശന സ്റ്റാളും. പത്രപ്രവര്‍ത്തനത്തിന്റെ ചരിത്രവും വര്‍ത്തമാനവും പറയുന്ന ഇല്ലസ്‌ട്രേഷനാണ് പ്രദര്‍ശനത്തിന്റെ പ്രധാന ആകര്‍ഷണം. മലയാളത്തിലെ പത്രപ്രവര്‍ത്തനത്തിന്റെ ഇന്നലെകളെ ഓര്‍മിപ്പിക്കുന്ന രീതിയില്‍ പഴയ പത്രങ്ങളുടെ അസ്സല്‍ പതിപ്പുകളും ചരിത്രപ്രധാനമായ പത്രങ്ങളുടെ കോപ്പികളും ഇവിടെയുണ്ടാവും. മനുഷ്യന്‍ ചന്ദ്രനില്‍ കാലുകുത്തിയത്, ഇന്ദിരാഗാന്ധി വധം, രാജീവ് ഗാന്ധി വധം, വൈക്കം മുഹമ്മദ് ബഷീര്‍ അന്തരിച്ചത് തുടങ്ങി ചരിത്രപരമായ പ്രത്യേകതകളടങ്ങിയ പത്രക്കട്ടിങ്ങുകള്‍, സുപ്രഭാതം ദിനപത്രത്തിന്റെ ആദ്യകോപ്പി, പ്രധാനപ്പെട്ട പേജുകള്‍ എന്നിവയും പ്രദര്‍ശിപ്പിക്കും.
പത്ര അച്ചടിയുടെ കഥ പറയുന്ന വൈവിധ്യമാര്‍ന്ന അച്ച്കൂടങ്ങള്‍, ടൈപ്പ്‌റൈറ്റര്‍, പുതിയകാലത്തെ പ്രിന്റിങ് സംവിധാനം എന്നിവയും പ്രദര്‍ശനം പരിചയപ്പെടുത്തും.
ഒരു ദിനപത്രത്തിന്റെ ഉത്ഭവം എങ്ങനെ നടക്കുന്നു എന്ന ഡോക്യുഫിക്ഷന്റെ പ്രദര്‍ശനവും പവലിയനിലുണ്ടാവും. വാര്‍ത്ത-ഫോട്ടോ ശേഖരണം, പേജ് വിന്യാസം, അച്ചടി, വിതരണം തുടങ്ങി വിവിധ ഘട്ടങ്ങള്‍ ഡോക്യുഫിക്ഷനില്‍ ഉള്‍കൊള്ളിച്ചിട്ടുണ്ട്. പ്രദര്‍ശന നഗരിയുടെ മുന്‍വശത്തായാണ് സുപ്രഭാതത്തിന്റെ പ്രദര്‍ശന പവലിയന്‍ ഒരുങ്ങുന്നത്.