ഏതന്‍സ്: ഒടുവില്‍ മാസിഡോണിയയ്ക്ക് അയല്‍നാട്ടുകാരുടെ അംഗീകാരം. മാസിഡോണിയയുടെ പേരിനെച്ചൊല്ലി മൂന്നു പതിറ്റാണ്ടോളം നീണ്ട തര്‍ക്കങ്ങള്‍ക്ക് അന്ത്യംകുറിച്ച് ഇന്നലെ ഗ്രീക്ക് പാര്‍ലമെന്റില്‍ നടന്ന ചരിത്രപരമായ വോട്ടെടുപ്പിലാണ് ഇക്കാര്യത്തില്‍ അന്തിമ തീരുമാനമായത്.
മാസിഡോണിയയുടെ പേര് അംഗീകരിക്കാനുള്ള ഭരണകൂട നീക്കത്തിനെതിരേ വന്‍ ജനകീയ പ്രതിഷേധം നിലനിന്നിരുന്നു.
പാര്‍ലമെന്റില്‍ നടന്ന വോട്ടെടുപ്പില്‍ 146നെതിരേ 153 വോട്ടുകള്‍ക്കാണ് റിപബ്ലിക് ഓഫ് നോര്‍ത്ത് മാസിഡോണിയ എന്ന പേര് അംഗീകരിച്ചുകൊണ്ടുള്ള ബില്‍ പാസായത്.

1991ല്‍ മാസിഡോണിയ സ്വ തന്ത്രമായ ശേഷം അവരുടെ പേര് അംഗീകരിക്കാന്‍ ഗ്രീസ് തയാറായിരുന്നില്ല. മാസിഡോണിയ എന്ന പേരില്‍ ഗ്രീസില്‍ മറ്റൊരു പ്രദേശമുണ്ടെന്നു ചൂണ്ടിക്കാട്ടിയായിരുന്നു ഇത്.
ഗ്രീക്ക് പ്രധാനമന്ത്രി അലെക്‌സിസ് സിര്‍പ്രാസ് ആണ് പേര് അംഗീകരിച്ചുകൊണ്ടുള്ള ചര്‍ച്ചയ്ക്കു തുടക്കമിട്ടത്.