ബെയ്ജിങ്: ചൈനയില്‍ കൊവിഡ് 19 വൈറസ് ബാധിച്ച് 44 പേര്‍കൂടി മരിച്ചു. ഇതോടെ ചൈനയില്‍ മരണസംഖ്യ 2,788 ആയി. ലോകത്തു വിവിധ രാജ്യങ്ങളിലായി വൈറസ് ബാധിച്ച് രണ്ടായിരത്ത് എണ്ണൂറിലേറെ പേര്‍ മരിച്ചതായാണ് റിപ്പോര്‍ട്ട്. എണ്‍പത്തിമൂവായിരത്തിലേറെ പേര്‍ക്കു വൈറസ് സ്ഥിരീകരിച്ചിട്ടുണ്ട്.
ഇറാനില്‍ വൈറസ് ബാധിച്ച് എട്ടുപേര്‍കൂടി മരിച്ചു. ഇതോടെ ഇറാനില്‍ മരണം 34 ആയി. രോഗം ബാധിച്ചവരുടെ എണ്ണം 388 ആയി ഉയര്‍ന്നു.
കഴിഞ്ഞ ദിവസം ഇറാന്‍ വൈസ് പ്രസിഡന്റിന് രോഗബാധ സ്ഥിരീകരിച്ചിരുന്നു. ദക്ഷിണ കൊറിയയില്‍ ഇന്നലെ 256 പേര്‍ക്കുകൂടി കൊറോണ ബാധിച്ചു.
ഇവിടെ ആകെ വൈറസ് ബാധിതരുടെ എണ്ണം 2,022 ആയി ഉയര്‍ന്നു. നേരത്തെ 13 പേര്‍ മരിച്ച ദക്ഷിണ കൊറിയയില്‍നിന്ന് ഇന്നലെ മരണം റിപ്പോര്‍ട്ട് ചെയ്യപ്പെട്ടിട്ടില്ല. ഇറ്റലിയില്‍ 650 പേര്‍ക്ക് വൈറസ് സ്ഥിരീകരിച്ചു. 17 പേരാണ് ഇറ്റലിയില്‍ ഇതുവരെ മരിച്ചത്.
നൈജീരിയ, ബെലാറസ് തുടങ്ങിയ രാജ്യങ്ങളില്‍ കഴിഞ്ഞ ദിവസം ആദ്യ കൊവിഡ് 19 കേസുകള്‍ റിപ്പോര്‍ട്ട് ചെയ്തിട്ടുണ്ട്. ബ്രിട്ടനിലെ വെയില്‍സിലും കൊവിഡ് 19 സ്ഥിരീകരിച്ചു.