കൊച്ചി: മൂന്ന് കേന്ദ്ര ജി.എസ്.ടി, എക്‌സൈസ് ഉദ്യോഗസ്ഥര്‍ രാഷ്ട്രപതിയുടെ പ്രത്യേക പുരസ്‌കാരത്തിന് അര്‍ഹരായി. കേന്ദ്ര എക്‌സൈസ് ആന്‍ഡ് കസ്റ്റംസ് തിരുവനന്തപുരം സോണ്‍ അഡിഷനല്‍ കമ്മിഷണര്‍ ഡോ. ടി. ടിജു ഐ.ആര്‍.എസ്, ഡി.ആര്‍.ഐ കൊച്ചി സോണില്‍നിന്ന് അസി. ഡയരക്ടറായി വിരമിച്ച പി. പ്രസാദ്, ഡി.ആര്‍.ഐ കൊച്ചി സോണ്‍ സീനിയര്‍ ഇന്റലിജന്‍സ് ഓഫിസര്‍ ശശിധരന്‍ എന്നിവര്‍ക്കാണു രാഷ്ട്രപതിയുടെ പ്രത്യേക പുരസ്‌കാരങ്ങള്‍ ലഭിച്ചത്.

1999 ഐ.ആര്‍.എസ് ബാച്ചിലെ സ്വര്‍ണ മെഡല്‍ ജേതാവ് കൂടിയായ ടിജു മികച്ച സേവനത്തിനുള്ള സര്‍ട്ടിഫിക്കറ്റ് രാഷ്ട്രപതിയില്‍നിന്ന് സ്വീകരിച്ചു. കസ്റ്റംസ്, കേന്ദ്ര എക്‌സൈസ് ആന്‍ഡ് ജി.എസ്.ടി, ഡി.ആര്‍.ഐ, സി.ഇ.ഡി.ടി.എ.ടി, സി.ഒ.ഐ.എന്‍, ദുബൈയിലെ സി.ജി.ഐ എന്നിവിടങ്ങളില്‍ ഇദ്ദേഹം സേവനമനുഷ്ഠിച്ചിട്ടുണ്ട്.

മികച്ച സേവനത്തിന് രാഷ്ട്രപതിയില്‍നിന്ന് സര്‍ട്ടിഫിക്കറ്റ് സ്വീകരിച്ച പി. പ്രസാദ് 1980ലെ കേന്ദ്ര എക്‌സൈസ് ആന്‍ഡ് കസ്റ്റംസ് ഇന്‍സ്‌പെക്ടര്‍മാരുടെ കേഡറില്‍ അംഗമായിരുന്നു. കേന്ദ്ര എക്‌സൈസ് ഇന്റലിജന്‍സ് ഡയരക്ടറേറ്റ് ജനറല്‍, റവന്യൂ ഇന്റലിജന്‍സ് ഡയരക്ടറേറ്റ് എന്നിവിടങ്ങളില്‍ 15 വര്‍ഷത്തിലധികം സേവനമനുഷ്ഠിച്ചിട്ടുണ്ട്. മികച്ച സേവനത്തിനുള്ള രാഷ്ട്രപതിയുടെ ബഹുമതി നേടിയ ശശിധരന്‍ കേന്ദ്ര എക്‌സൈസ് ആന്‍ഡ് കസ്റ്റംസ് കൊച്ചി സോണിലെ 1994 ബാച്ച് അംഗമാണ്. 2012 മുതല്‍ ഡയരക്ടറേറ്റ് ഓഫ് റവന്യൂ ഇന്റലിജന്‍സ് കൊച്ചി സോണിലെ സീനിയര്‍ ഇന്റലിജന്‍സ് ഓഫിസറായി ഡെപ്യൂട്ടേഷനില്‍ പ്രവര്‍ത്തിച്ചുവരികയാണ്.