തിരുവനന്തപുരം: വിദേശത്തേക്ക് കടത്താന്‍ ശ്രമിച്ച ലക്ഷങ്ങളുടെ വിദേശ കറന്‍സിയുമായി ഒരാള്‍ പിടിയില്‍. കാസര്‍കോട് സ്വദേശി കമാലുദ്ദീനെ(20)യാണ് ഡയരക്ടറേറ്റ് ഓഫ് റവന്യൂ ഇന്റലിജന്‍സ് (ഡി.ആര്‍.ഐ )സംഘം തിരുവനന്തപുരം വിമാനത്താവളത്തില്‍ പിടികൂടിയത്.
ഇയാളുടെ ബാഗില്‍നിന്ന് 18.50 ലക്ഷം രൂപ മൂല്യമുള്ള സഊദി, ഒമാന്‍, യു.എസ് കറന്‍സി പിടിച്ചെടുത്തു. രഹസ്യവിവരത്തെ തുടര്‍ന്നാണ് ഡി.ആര്‍.ഐ സംഘം വിമാനത്താവളത്തില്‍ എത്തി പരിശോധന നടത്തിയത്. ഞായറാഴ്ച പുലര്‍ച്ചെയുള്ള എയര്‍ അറേബ്യന്‍ വിമാനത്തില്‍ ഷാര്‍ജയിലേക്ക് പോകാനാണ് യുവാവ് എത്തിയത്. ഇയാള്‍ ബാഗിനുള്ളില്‍ പ്രത്യേക അറയുണ്ടാക്കിയാണ് കറന്‍സി കടത്താന്‍ ശ്രമിച്ചതെന്ന് ഡി.ആര്‍.ഐ ഉദ്യോഗസ്ഥര്‍ പറഞ്ഞു.