വാഷിങ്ടണ്‍: അമേരിക്കയില്‍ സിക്കുകാരെ വെടിവച്ചയാളെ കണ്ടെത്താന്‍ പൊലിസ് എഫ്.ബി.ഐയുടെ സഹായം തേടി. കേസില്‍ വംശീയ ആക്രമണത്തിന്റെ തെളിവു ലഭിച്ച സാഹചര്യത്തിലാണിത്. സ്വന്തം രാജ്യത്തേക്ക് തിരിച്ചുപോകൂ എന്ന് പറഞ്ഞാണ് അക്രമി ഇന്ത്യക്കാരനായ ദീപ് റായി (39) നെ വെടിവച്ചത്. ഇന്ത്യന്‍ വംശജനായ യു.എസ് പൗരനാണ് ദീപ് റായ്. ആറടി ഉയരമുള്ള വെള്ളക്കാരനാണ് പ്രതിയെന്നാണ് പൊലിസ് പറയുന്നത്.
ഇയാളെ തിരിച്ചറിയാനും കണ്ടെത്താനുമുള്ള ശ്രമത്തിലാണ് പൊലിസ്. കഴിഞ്ഞയാഴ്ച കന്‍സാസില്‍ ഇന്ത്യന്‍ എന്‍ജിനീയര്‍ വെടിയേറ്റ് മരിക്കാനിടയായ സംഭവത്തെ കുറിച്ചും എഫ്.ബി.ഐ അന്വേഷണം നടത്തുന്നുണ്ട്.
അതിനിടെ, ഇന്ത്യാക്കാര്‍ക്കു നേരെയുണ്ടായ ആക്രമണങ്ങളില്‍ ഉടന്‍ നീതിപൂര്‍വമായ നടപടി സ്വീകരിക്കുമെന്ന് അമേരിക്ക വ്യക്തമാക്കി. സംഭവങ്ങളില്‍ അമേരിക്കന്‍ ഭരണകൂടം അനുശോചനം രേഖപ്പെടുത്തിയതായി വാഷിങ്ടണിലെ ഇന്ത്യന്‍ എംബസി ട്വിറ്ററിലൂടെ അറിയിച്ചു.
ഇത്തരം സംഭവങ്ങള്‍ ആവര്‍ത്തിക്കാതിരിക്കാന്‍ ബന്ധപ്പെട്ട ഏജന്‍സികള്‍ക്കു നിര്‍ദേശം നല്‍കുമെന്നും യു.എസ് ഉറപ്പു നല്‍കി.
ആക്രമണങ്ങളില്‍ യു.എസിലെ ഇന്ത്യന്‍ അംബാസഡര്‍ നവ്‌തേജ് സര്‍ന യു.എസ് സ്‌റ്റേറ്റ് ഡിപ്പാര്‍ട്ട്‌മെന്റിനെ ആശങ്ക അറിയിച്ചിരുന്നു.