ബെയ്ജിങ്:  ലോകത്തെ ഭീതിയിലാഴ്ത്തി കൊവിഡ്-19 വൈറസ് കൂടുതല്‍ രാജ്യങ്ങളിലേക്ക് പടരുന്നു. യൂറോപ്പിലും പശ്ചിമേഷ്യയിലും വൈറസ് അനിയന്ത്രിതമായി പടരുകയാണ്. സഊദിയിലും ജോര്‍ദാനിലും കൊവിഡ് റിപ്പോര്‍ട്ട് ചെയ്തതോടെ ജി.സി.സി രാജ്യങ്ങളിലെല്ലാം വൈറസ് വ്യാപിച്ചു. ഇറാനിലാണ് വൈറസ് വന്‍ ആള്‍നാശമുണ്ടാക്കിയിരിക്കുന്നത്. 

അതിനിടെ സഊദിക്കു പുറമെ ഇന്തോനീഷ്യ, ജര്‍മനി, ചെക് റിപ്പബ്ലിക്, സ്‌കോട്ട്‌ലാന്‍ഡ്, ഡൊമിനിക്കന്‍ റിപ്പബ്ലിക് എന്നീ രാജ്യങ്ങളില്‍ ആദ്യ കൊവിഡ് കേസുകള്‍ ഇന്നലെ റിപ്പോര്‍ട്ട് ചെയ്തു. ഇന്തോനീഷ്യയില്‍ രണ്ടുപേരിലാണ് വൈറസ് സ്ഥിരീകരിച്ചത്.  ചൈനയില്‍ 42 മരണം കൂടി റിപ്പോര്‍ട്ട് ചെയ്തതോടെ രാജ്യത്ത് കൊവിഡ് മരണം 2,912 ആയി ഉയര്‍ന്നു. അതേസമയം വൈറസ് വ്യാപനം കുറഞ്ഞ ഇവിടെ 202 പേരിലേ പുതുതായി രോഗം സ്ഥിരീകരിച്ചിട്ടുള്ളൂ. ലോകമാകെ കൊവിഡ് മരണം 3060 ആയി. 

 കുവൈത്തില്‍ 10 പേര്‍ക്കു കൂടി വൈറസ് ബാധിച്ചു. രാജ്യത്ത് 56 പേര്‍ക്കാണ് കൊവിഡ് സ്ഥിരീകരിച്ചത്.  ദക്ഷിണ കൊറിയയില്‍ 476 പേര്‍ക്കു കൂടി വൈറസ് സ്ഥിരീകരിച്ചതോടെ രോഗബാധിതര്‍ 4,212 ആയി. ഇതില്‍ നാലുപേര്‍ മരിച്ചു. 

യു.എസില്‍ രണ്ടാമത്തെ കൊവിഡ് മരണം റിപ്പോര്‍ട്ട് ചെയ്തു. വാഷിങ്ടണിലെ 70കാരനാണ് മരിച്ചത്. രാജ്യത്ത് 13 പേര്‍ക്ക് വൈറസ് ബാധിച്ചതായി പരിശോധനയില്‍ തെളിഞ്ഞിട്ടുണ്ട്. ഫ്‌ളോറിഡയില്‍ ആരോഗ്യ അടിയന്തരാവസ്ഥ പ്രഖ്യാപിച്ചിട്ടുണ്ട്. ഇറ്റലിയില്‍ കൊവിഡ് ബാധിച്ചവരുടെ എണ്ണം 1,694 ആയി. ഫ്രാന്‍സില്‍ 130 കേസുകളാണ് റിപ്പോര്‍ട്ട് ചെയ്തിട്ടുള്ളത്. അതിനിടെ കൊവിഡ് ഭയന്ന് മലേഷ്യയില്‍ നടക്കാനിരുന്ന അസ്‌ലന്‍ ഷാ കപ്പ് ഹോക്കി ടൂര്‍ണമെന്റ് മാറ്റിവച്ചു. 

 

 

 

 

തെഹ്‌റാന്‍: ഇറാനില്‍ ഇന്നലെ 11 പേര്‍ കൂടി മരിച്ചതോടെ രാജ്യത്ത് ഇതുവരെ കൊവിഡ് ബാധിച്ച് മരിച്ചവരുടെ എണ്ണം 54 ആയി.  ഇതോടെ ചൈന കഴിഞ്ഞാല്‍ ഏറ്റവും കൂടുതല്‍ പേര്‍ മരിച്ച രാജ്യമായി ഇറാന്‍. 

പരമോന്നത നേതാവ് ആയത്തുല്ലാ അലി ഖാംനഇയുടെ ഉപദേശകനും മരിച്ചവരില്‍ പെടും. എക്‌സ്‌പെഡിയന്‍സി കൗണ്‍സില്‍ അംഗം മുഹമ്മദ് മിര്‍ മുഹമ്മദി(71)യാണ് മരിച്ചത്. 

നേരത്തെ ഇറാന്‍ പാര്‍ലമെന്റ് അംഗവും കൊവിഡ് ബാധിച്ച് മരിച്ചിരുന്നു.