കോട്ടയം: നാടിനെ നടുക്കിയ പാറമ്പുഴ കൂട്ടക്കൊല കേസിലെ  നടപടി 14ലേക്ക് മാറ്റി. ഇന്നലെ  രാവിലെ കേസ് പരിഗണിച്ച കോടതി രണ്ടു വിഷയങ്ങളില്‍ വ്യക്തത വരുത്തുന്നതിനായി പ്രോസിക്യൂട്ടറോട് നിര്‍ദേശിച്ചു. കൊലപാതകം നടന്ന ദിവസം പ്രതി ഉപയോഗിച്ചിരുന്ന പാന്റ്, പ്രതിയുടെ പക്കല്‍ നിന്നും ലഭിച്ച മൊബൈല്‍ ഫോണ്‍, കൊലപാതകം നടന്ന വീട്ടിലെ തറയില്‍ നിന്നും ലഭിച്ച മുടിനാരുകള്‍ തുടങ്ങിയവയെ സംബന്ധിച്ചാണ് വ്യക്തത വരുത്തണമെന്ന്  കോടതി ആവശ്യപ്പെട്ടത്.
പ്രതിയുടെ പക്കല്‍ നിന്നും പൊലിസ് പിടിച്ചെടുത്ത മൊബൈല്‍ ഫോണ്‍ കൊല്ലപ്പെട്ടവരുടെയോ, പ്രതിയുടേതോ അല്ലായിരുന്നു. ഇതിലാണ് കോടതി വിശദീകരണം ചോദിച്ചത്. കൊലപാതകത്തിനു ശേഷം പ്രതി ഡല്‍ഹിയിലെത്തിയപ്പോള്‍ മൊബൈല്‍ ഫോണ്‍ വാങ്ങിയതാണെന്ന് പ്രോസിക്യൂട്ടര്‍ കോടതിയെ ധരിപ്പിച്ചു.
ഇന്നു വിധി പ്രതീക്ഷിച്ചിരിക്കവേ അപ്രതീക്ഷിതമായാണ് കോടതി കൂടുതല്‍ വിവരങ്ങള്‍ പ്രോസിക്യൂട്ടറില്‍ നിന്നും തേടിയത്. ഇതിനു ശേഷം 14ന് കേസ് പരിഗണിക്കാമെന്ന് കോടതി പറഞ്ഞു. അന്നേദിവസം പ്രതി കുറ്റക്കാരനാണോയെന്ന് കോടതി പ്രഖ്യാപിക്കുകയും തുടര്‍ന്ന് വിധി പ്രസ്താവന ഉണ്ടാവുകയും ചെയ്യും.
2015 മേയ് 16നു അര്‍ധരാത്രി കോട്ടയം പാറമ്പുഴ മൂലേപ്പറമ്പില്‍ ലാലസന്‍ (71), ഭാര്യ പ്രസന്നകുമാരി (62), മകന്‍ പ്രവീണ്‍ ലാല്‍ (28) എന്നിവരെ കൊലപ്പെടുത്തിയ കേസില്‍ ഫിറോസാബാദ് സ്വദേശി നരേന്ദ്രകുമാര്‍ കുമാറാണ്് പ്രതി. മൂലേപ്പമ്പില്‍ വീട്ടിലെ തുണി അലക്കു കമ്പനിയില്‍ തുണി തേയ്പ്പ് ജോലിക്കാരനായിരുന്നു പ്രതി. സ്വന്തം കടബാധ്യതകള്‍ വീട്ടാനുള്ള പണം കൈവശപ്പെടുത്താന്‍ നരേന്ദര്‍ കുമാര്‍ കൊലനടത്തി ആഭരണവും പണവുമായി സ്ഥലം വിടുകയായിരുന്നു.  
മൂന്നുപേരെയും ക്രൂരമായി കൊലചെയ്തശേഷം  കോട്ടയം റെയില്‍വേ സ്‌റ്റേഷനിലെത്തി ട്രെയിന്‍ കയറിയ പ്രതിയെ പാമ്പാടി സി.ഐ സാജു വര്‍ഗീസിന്റെ നേതൃത്വത്തില്‍ കോട്ടയത്തുനിന്നു പോയ ഏഴംഗ പൊലിസ് ഫിറോസാബാദിലെത്തിയാണ് അറസ്റ്റു ചെയ്തത്.
കൊല്ലപ്പെട്ടവരുടെ മൃതദേഹത്തില്‍ 15ലധികം മുറിവുകളുണ്ടായിരുന്നു. പ്രസന്നകുമാരിയുടെ കാത് പ്രതി മുറിച്ചെടുത്തിരുന്നു. കാത് പിന്നീട് ഫിറോസാബാദിലെ പ്രതിയുടെ വീട്ടില്‍ നിന്നും പൊലിസ് കണ്ടെടുത്തിയിരുന്നു. ഇതാണ് പ്രധാന തെളിവായി പൊലിസ് കോടതിയില്‍ ഹാജരാക്കിയത്. കേസിന്റെ വിചാരണവേളയില്‍ ഉത്തര്‍പ്രദേശ് പൊലിസിലെ ഒരു സര്‍ക്കിള്‍ ഇന്‍സ്‌പെക്ടറും എസ്.ഐയും കോട്ടയത്തെ കോടതിയില്‍ മൊഴി നല്‍കാന്‍ എത്തിയിരുന്നു.
പ്രോസിക്യൂഷന്‍ 53 സാക്ഷികളെ വിസ്തരിച്ചു. 100 പ്രമാണങ്ങളും 40 തൊണ്ടി സാധനങ്ങളും പ്രോസിക്യൂഷന്‍ ഹാജരാക്കി. വിധി കേള്‍ക്കാന്‍ കൊല്ലപ്പെട്ടവരുടെ ബന്ധുക്കള്‍ കോടതിയില്‍ എത്തിയിരുന്നു. അഭിഭാഷകരും മാധ്യമപ്രവര്‍ത്തകരുമടക്കം ഒട്ടേറെ പേര്‍ എത്തിയിരുന്നു. പ്രോസിക്യൂഷനു വേണ്ടി രഞ്ജിത് ജോണും പ്രതിക്കു വേണ്ടി കോടതി നിയോഗിച്ച ജിതേഷ് ബാബുവുമാണ് കോടതിയില്‍ ഹാജരായത്.