തെല്‍ അവീവ്: ഇസ്‌റാഈലിനെ വിറപ്പിച്ച് വീണ്ടും ഹിസ്ബുല്ല. പ്രമുഖ നഗരങ്ങളായ തെല്‍ അവീവിനും ഹൈഫക്കും നേരെ വീണ്ടും റോക്കറ്റുകളയച്ചു. ആക്രമണത്തിന് പിന്നാലെ നഗരങ്ങളില്‍ മുന്നറിയിപ്പ് സൈറണ്‍ മുഴങ്ങി. തെല്‍ അവീവില്‍ അടിയന്തരാവസ്ഥ പ്രഖ്യാപിച്ചിരിക്കുകയാണ്.

തെല്‍ അവീവിന് സമീപത്തെ ഗിലോറ്റ് സൈനിക കേന്ദ്രത്തിന് നേരെയായിരുന്നു ഹിസ്ബുല്ലയുടെ ആദ്യ ആക്രമണമുണ്ടായത്. ഇതിന് പിന്നാലെ ഹൈഫയെ ലക്ഷ്യമിട്ട് ഹിസ്ബുല്ലയുടെ ആക്രമണമുണ്ടായി. സ്റ്റെല്ല മേരിസ് നാവികതാവളത്തിന് നേരെയായിരുന്നു ആക്രമണം. 

മധ്യദൂര മിസൈലുകളാണ് ഇസ്‌റാഈലിനെ ലക്ഷ്യമിട്ട് ഹിസ്ബുല്ല തൊടുത്തതെന്നാണ് അല്‍ ജസീറ റിപ്പോര്‍ട്ട് ചെയ്യുന്നത്. ആക്രമണമുണ്ടായി മിനിറ്റുകള്‍ക്കം തന്നെ ഇസ്‌റാഈലില്‍ മുന്നറിയിപ്പ് സൈറണുകളും മുഴങ്ങിയെന്നും അല്‍ ജസീറയുടെ റിപ്പോര്‍ട്ടില്‍ പറയുന്നു. വടക്കന്‍ ഇസ്‌റാഈലില്‍ ഹിസ്ബുല്ല നടത്തിയ ആക്രമണത്തില്‍ ഒരാള്‍ കൊല്ലപ്പെട്ടുവെന്നും റിപ്പോര്‍ട്ടുകളുണ്ട്.

സിസേറിയ നഗരത്തില്‍ നടന്ന ആക്രമണമെന്ന പേരില്‍ ചില ചിത്രങ്ങളും ഹിസ്ബുല്ല പുറത്തുവിട്ടിരുന്നു. എന്നാല്‍, ഇതിന്റെ ഉത്തരവാദിത്തം അവര്‍ ഏറ്റെടുത്തിട്ടില്ല. 

അതിനിടെ, വടക്കന്‍ ഗസ്സയില്‍ ഇസ്‌റാഈല്‍ നടത്തിയ ആക്രമണത്തില്‍ 15 പേര്‍ കൊല്ലപ്പെട്ടു. ബെയ്ത് ലാഹിയയിലാണ് ആക്രമണമുണ്ടായതെന്ന് വഫ ന്യൂസ് ഏജന്‍സി റിപ്പോര്‍ട്ട് ചെയ്തു. മരിച്ചവരില്‍ സ്ത്രീകളും കുട്ടികളും ഉള്‍പ്പെടുമെന്നും വഫയുടെ റിപ്പോര്‍ട്ടില്‍ പറയുന്നു.