കൊടുങ്ങല്ലൂര്‍: കണ്ണൂരിനെ വിറപ്പിച്ച പുലി കോട്ടപ്പുറം ചന്തയില്‍ കുടുങ്ങി. കണ്ണൂരില്‍ നിന്നും തിരുവനന്തപുരത്തേക്ക് കൊണ്ടു പോകും വഴിയാണ് പുലിയെ കയറ്റിയ വാഹനം വഴിതെറ്റി കോട്ടപ്പുറം ചന്തയിലെത്തിയത്. ആഴ്ച്ച ചന്ത ദിവസമായതിനാല്‍  നേന്ത്രക്കായ കയറ്റിവന്ന ലോറികള്‍ക്കിടയില്‍ പുലി വാഹനം കുരുങ്ങുകയായിരുന്നു. ടാര്‍പോളിന്‍ കൊണ്ട് മൂടിയ ഇരുമ്പ് കൂട് കയറ്റിയ വാഹനം ഗതാഗതകുരുക്കില്‍ പെട്ട് കിടന്ന സമയത്താണ് കള്ളിവെളിച്ചത്തായത്. പൊലിസ് കാവലില്‍ വന്ന വണ്ടിയില്‍ എന്തെന്നറിയാനുള്ള കൗതുകം കൊണ്ട് ടാര്‍പോളിന്‍ നീക്കി നോക്കിയ തൊഴിലാളികളിലൊരാളാണ് കൂട്ടിലടച്ച പുലിയാണതെന്ന രഹസ്യം കണ്ടെത്തിയത്. ആള്‍കൂട്ടത്തെകണ്ട് വിരണ്ട പുലി മുരണ്ടതോടെ ജനവും വിരണ്ടു. ഗതാഗതക്കുരുക്കൊഴിഞ്ഞ് പുലിയെ കൊണ്ടുപോയിട്ടും നാട്ടുകാരില്‍ കൗതുകം ഒഴിഞ്ഞില്ല.