ഇരിട്ടി: വാണിയപ്പാറയില്‍ ഇറങ്ങിയ കടുവയെ പിടികൂടാന്‍ വനംവകുപ്പ് വനാതിര്‍ത്തിയോട് ചേര്‍ന്ന പ്രദേശത്ത് കൂട് സ്ഥാപിക്കാന്‍ നീക്കങ്ങളാരംഭിച്ചു. കടുവയെ കണ്ടെത്താനായി പ്രദേശത്ത് തിരച്ചില്‍ നടത്തുന്നുണ്ട്. കഴിഞ്ഞ ദിവസം കടുവ കടിച്ചുകൊന്ന കറവപ്പശുവിന്റെ ജഡം മൃഗസംരക്ഷണ, വനം വകുപ്പ് പരിശോധനക്ക് ശേഷം സംസ്‌കരിച്ചു. വാണിയപ്പാറ കരിയില്‍ തുടിമരത്തെ കുന്നേപറമ്പില്‍ ജോയിയുടെ രണ്ട് കറവപ്പശുക്കളെയാണ് കടുവ കഴിഞ്ഞ ദിവസം അക്രമിച്ചത്. ജോയിക്ക് അര്‍ഹമായ നഷ്ടപരിഹാരം ലഭ്യമാക്കണമെന്ന് കര്‍ഷകസംഘം അയ്യങ്കുന്ന് വില്ലേജ് കമ്മിറ്റി വനംവകുപ്പ്അധികതരോട് ആവശ്യപ്പെട്ടിരുന്നു. അധികൃതര്‍ ഇന്നലെ സംഭവസ്ഥലത്തെത്തി വിവരങ്ങള്‍ ശേഖരിച്ച് റിപ്പോര്‍ട്ട് തയാറാക്കി ഉന്നതമേധാവികള്‍ക്ക് കൈമാറി. ഇതിന്റെ അടിസ്ഥാനത്തില്‍ സാമ്പത്തിക സഹായം അനുവദിക്കുമെന്ന് അധികൃതര്‍ അറിയിച്ചു.