ആനക്കര: മുണ്ട്രക്കോട് പുഷ്പംകുന്നില്‍ തീപിടിത്തത്തില്‍ നിരവധി റബര്‍ മരങ്ങള്‍ അഗ്നിക്കിരയായി. കഴിഞ്ഞ ദിവസം ഉച്ചയോടെയാണ് സംഭവം. കുന്നിന് താഴെ നിരവധി കുടുംബങ്ങള്‍ താമസിക്കുന്നുണ്ട്. ഏക്കര്‍ കണക്കിന് സ്ഥലമാണ് കത്തി നശിച്ചത്.
കടത്തനാട് വേണുഗോപാലന്‍, ജനാര്‍ദ്ദനന്‍ നായര്‍, ജയകൃഷ്ണന്‍ എന്നിവരുടെ സ്ഥലത്തുളള റബര്‍ മരങ്ങളാണ് തീ കത്തി നശിച്ചത്. കടത്തനാട് വേണുഗോപാലന്റെ മാത്രം അന്‍പതിലേറെ മരങ്ങള്‍ പൂര്‍ണമായി കത്തി നശിച്ചു. നാട്ടുകാരുടെ നേതൃത്വത്തില്‍ തീയണച്ചതിനാല്‍ കൂടുതല്‍ നാശനഷ്ട്ടമുണ്ടായില്ല. ആനക്കര പഞ്ചായത്തിലെ ഏറ്റവും ഉയര്‍ന്ന സ്ഥലമാണിത്.