കൊല്‍ക്കത്ത: ഐ ലീഗില്‍ സമനിലക്കുരുക്കൊഴിയാതെ ഗോകുലം കേരള എഫ്.സി. ഇന്നലെ കൊല്‍ക്കത്തയിലെ സാള്‍ട്ട്‌ലേക്ക് സ്റ്റേഡിയത്തില്‍ നടന്ന മത്സരത്തില്‍ കരുത്തരായ മോഹന്‍ ബഗാനാണ് ഗോകുലത്തെ 2-2 സമനിലയില്‍ തളച്ചത്. ഒരു ഗോളിന് ലീഡില്‍ നിന്ന ശേഷമാണ് ഗോകുലം സമനില വഴങ്ങിയത്.
ബഗാന്റെ മുന്നേറ്റത്തോടെയാണ് മത്സരം തുടങ്ങിയത്. അക്രമിച്ചു കളിച്ച ബഗാന്‍ 18ാം മിനിട്ടില്‍ അര്‍ഹിച്ച ഗോള്‍ കണ്ടെത്തി. സോണി നോര്‍ദെയുടെ അസിസ്റ്റില്‍ നിന്ന് ഷിള്‍ട്ടണ്‍ ഡി.സില്‍വയാണ് ഗോള്‍ നേടിയത്. ഗോള്‍വഴങ്ങിയതോടെ ഗോകുലവും മുന്നേറ്റം ശക്തമാക്കി. 21ാം മിനിട്ടില്‍ പ്രതിരോധ താരം ലാല്‍ചൗകിമയുടെ സെല്‍ഫ്‌ഗോളില്‍ ഗോകുലം മോഹന്‍ ബഗാനെ ഒപ്പംപിടിച്ചു.
തൊട്ടുപിന്നാലെ തന്നെ കൊല്‍ക്കത്തന്‍ കരുത്തരെ ഞെട്ടിച്ച് മാര്‍ക്കസ് ജോസഫിലൂടെ ഗോകുലം ലീഡെടുത്തു. മലയാളി താരം വി.പി സുഹൈറാണ് ഗോളിന് വഴിയൊരുക്കിയത്. ആദ്യ പകുതിയില്‍ ഒരു ഗോളിന്റെ ലീഡുമായി കളംവിട്ട ഗോകുലത്തിന് രണ്ടാം പകുതിയില്‍ ലീഡ് നിലനിര്‍ത്താനായില്ല.
60ാം മിനിട്ടില്‍ ദിപാന്ദ ഡിക്കയിലൂടെ മോഹന്‍ ബഗാന്‍ തിരിച്ചടിച്ചു. ഹെന്റി കിസേക്കയുടെ അസിസ്റ്റില്‍ നിന്നാണ് താരം വലകുലുക്കിയത്. ലീഗില്‍ 14 മത്സരങ്ങള്‍ കഴിഞ്ഞപ്പോള്‍ 12 പോയിന്റുമായി ഗോകുലം ഒന്‍പതാം സ്ഥാനത്താണ്. 22 പോയിന്റുള്ള മോഹന്‍ ബഗാന്‍ ആറാം സ്ഥാനത്താണ്.