ഫറോക്ക്: ഒന്നു മുതല്‍ ഏഴ് വരെയുളള കാഴ്ചയില്ലാത്ത വിദ്യാര്‍ഥികള്‍ക്ക് ഇനി പരസഹായമില്ലാതെ പരീക്ഷ എഴുതാം. സര്‍വശിക്ഷാ അഭിയാന്‍ ഈ വര്‍ഷം മുതല്‍ കാഴ്ചയില്ലാത്തവര്‍ക്ക് ബ്രെയില്‍ ലിപിയില്‍ പരീക്ഷാ പേപ്പര്‍ തയാറാക്കിയത് വിദ്യാര്‍ഥികള്‍ക്കും അധ്യാപകര്‍ക്കും വലിയ ആശ്വാസമായിരിക്കുകയാണ്. ഇതുവരെ മറ്റുളള വിദ്യാര്‍ഥികളുടെ ചോദ്യപേപ്പര്‍ ഉപയോഗിച്ചാണ് കാഴ്ചയില്ലാത്തവരും പരീക്ഷ എഴുതിയിരുന്നത്. ഇതില്‍ വിദ്യാര്‍ഥികള്‍ക്കുളള പ്രയാസം മനസിലാക്കിയാണ് ഇവര്‍ക്കുളള ചോദ്യപേപ്പര്‍ എസ്.എസ്.എ ബ്രെയില്‍ ലിപിയിലേക്ക് മാറ്റിയത്.
പുതുതായി ചുമതലയേറ്റ എസ്.എസ്.എ പ്രോഗ്രാം ഓഫിസര്‍ സാജു ജോണാണ് ചോദ്യപേപ്പര്‍ ബ്രെയില്‍ ലിപിയിലേക്ക് മാറ്റാന്‍ തയാറായത്. ഈ വാര്‍ഷിക പരീക്ഷക്ക് ബ്രെയില്‍ ലിപിയിലുളള ചോദ്യപേപ്പറാണ് നല്‍കിയിരിക്കുന്നത്.
പരീക്ഷ എഴുതാനുളള ആത്മവിശ്വാസം വര്‍ധിപ്പിക്കുന്നതോടൊപ്പം അധ്യാപകര്‍ക്കും ആശ്വാസമാണെന്ന് കൊളത്തറ വികലാംഗ വിദ്യാലയത്തിലെ പ്രധാന അധ്യാപകന്‍ സി.കെ അബൂബക്കര്‍ പറഞ്ഞു.
ഉയര്‍ന്ന ക്ലാസുകളിലുളള കാഴ്ചയില്ലാത്ത കുട്ടികള്‍ക്കും ബ്രെയില്‍ ലിപിയില്‍ തന്നെ ചോദ്യപേപ്പര്‍ തയാറാക്കി നല്‍കണമെന്നാവശ്യവും ഇതിനോടകം ഉയര്‍ന്നിട്ടുണ്ട്.