തിരുവനന്തപുരം: കൊവിഡ് പടരുന്ന സാഹചര്യത്തില്‍ സംസ്ഥാനം അതീവ ജാഗ്രതയിലാണെന്ന് ആരോഗ്യമന്ത്രി കെ.കെ ശൈലജ. അതേ സമയം കൊവിഡ് മരണസാധ്യത തള്ളിക്കളയാനാവില്ലെന്നും മന്ത്രി കൂട്ടിചേര്‍ത്തു. നിയമ സഭയില്‍ പ്രതിപക്ഷ നേതാവിന്റെ സബ്മിഷന് മറുപടി പറയുകയായിരുന്നു മന്ത്രി.

കോട്ടയം മെഡിക്കല്‍ കോളജില്‍ ചികിത്സയില്‍ കഴിയുന്ന 85 വയസുള്ള സ്ത്രീയുടെ ആരോഗ്യനില ഗുരുതരമായി തുടരുകയാണ്. സംസ്ഥാനത്ത് ഇതുവരെ 14പേര്‍ക്കാണ് കൊവിഡ് സ്ഥിരീകരിച്ചത്.

പത്തനംതിട്ടയില്‍ പുതിയ കൊവിഡ് ബാധ സ്ഥിരീകരണമില്ലെന്ന് പത്തനംതിട്ട ജില്ലാ കലക്ടര്‍ നൂഹ് അറിയിച്ചു. പരിശോധനയ്ക്ക് അയച്ച 12 രക്ത സാംപിളുകളുടെ ഫലം ഇന്ന് ലഭ്യമാകും. വീടുകളില്‍ നിരീക്ഷണത്തിലുള്ളവര്‍ പുറത്തിറങ്ങിയാല്‍ കര്‍ശന നടപടി സ്വീകരിക്കും.ജില്ലയില്‍ 900 ആളുകളാണ് ഇപ്പോള്‍ വീടുകളില്‍ നീരീക്ഷണത്തില്‍ കഴിയുന്നത്. 28 ആളുകള്‍ ആശുപത്രികളിലുമുണ്ട്.

ഇതില്‍ രോഗബാധ സ്ഥിരീകരിച്ചത് ഏഴ് കേസുകള്‍ മാത്രമാണ്.ആകെ 24 സാംപിളുകളുടെ പരിശോധന ഫലമാണ് വരാനുള്ളത്.അവയില്‍ 12 എണ്ണത്തിന്റെ ഫലം ഇന്നറിയുന്നതോടെ ബാക്കിവരുന്ന പരിശോധനാ ഫലം നാളെയോടെയും എത്തും. കൊവിഡ് സ്ഥിരീകരിച്ച രോഗികള്‍ സന്ദര്‍ശിച്ച സ്ഥലങ്ങളുടെ റൂട്ട് മാപ്പ് പുറത്തുവിട്ടതിനെ തുടര്‍ന്ന് 30പേര്‍ ആരോഗ്യ വകുപ്പ് അധികൃതരുമായി ബന്ധപ്പെട്ടിട്ടുണ്ട്.നിരീക്ഷണത്തില്‍ കഴിയുന്നവര്‍ പുറത്തിറങ്ങിയാല്‍ അവര്‍ക്കെതിരേ പൊലിസ് കര്‍ശന നടപടി സ്വീകരിക്കും.