കല്‍പ്പറ്റ: വീടിന്റെ മതില്‍ വീണു ആദിവാസി യുവാവ് മരിച്ചു. മാണ്ടാട് ചായ്വേല്‍ മൂത്തേടം കോളനിയില്‍ കണാരന്റെ മകന്‍ സുരേഷാ(40)ണ് മരിച്ചത്. കൂലിപ്പണിക്കാരനായ സുരേഷ് സമീപത്തെ വീട്ടില്‍ ജോലിചെയ്യുന്നതിനിടയിലാണ് അപകടത്തില്‍പ്പെട്ടത്.
മതിലിന് ഇടയില്‍ മണ്ണിടുന്നതിനായി താഴെ നിന്ന് മുകളിലേക്ക് മണ്ണെടുത്തുകൊടുക്കുന്നതിനിടെ മതില്‍ മറിഞ്ഞുവീഴുകയായിരുന്നു.
ഒരാള്‍ പൊക്കത്തില്‍ സിമന്റുകട്ടയില്‍ നിര്‍മിച്ച മതിലാണ് സുരേഷിന്റെ ദേഹത്തുവീണത്. ചുണ്ടയാണ് സുരേഷിന്റെ മാതാവ്. ഭാര്യ: ചന്ദ്രിക. സഹോദരങ്ങള്‍: ബാലന്‍, ശേഖരന്‍, ശങ്കരന്‍.