വില്യാപ്പള്ളി: ടിപ്പുവിന്റെ പടയോട്ടം കൊണ്ടും കുറുക്കാട്ട് തമ്പുരാക്കന്മാരുടെ വീരേതിഹാസം കൊണ്ടും പേരുകേട്ട വില്യാപ്പള്ളിയുടെ ചരിത്രം പുസ്തകമാക്കുന്നു. 'താളിയോല, ഒരു വില്യാപ്പള്ളി വൃത്താന്തം' എന്ന പേരിലാണ് പുസ്തകം പുറത്തിറങ്ങുന്നത്. വില്യാപ്പള്ളി മുസ്‌ലിം ജമാഅത്ത് ഖത്തര്‍ കമ്മിറ്റിയാണ് ഇതിനു നേതൃത്വം കൊടുക്കുന്നത്. നേരത്തെ ചരിത്ര ശേഖരണവുമായി ബന്ധപ്പെട്ട് കാരണവര്‍ സംഗമം നടത്തിയിരുന്നു. അതിനു പുറമെ ചരിത്ര സെമിനാറും സംഘടിപ്പിച്ചിരുന്നു. രണ്ടു പരിപാടിയും ഏറെ ശ്രദ്ധിക്കപ്പെട്ടു. പഴയ തലമുറയിലെ നിരവധി ആളുകളുമായി അഭിമുഖം നടത്തിയും പഴയ രേഖകള്‍ പരിശോധിച്ചുമാണ് ചരിത്രം രേഖപ്പെടുത്തുന്നത്. വില്യാപ്പള്ളിക്കാരുടെ ഏറെക്കാലത്തെ സ്വപ്നമാണ് ചരിത്രം പുസ്തകമാക്കുന്നതോടെ യാഥാര്‍ഥ്യമാകുക.
പാണക്കാട് സയ്യിദ് മുനവറലി ശിഹാബ് തങ്ങള്‍, ഗോപിനാഥ് മുതുകാട്, പാറക്കല്‍ അബ്ദുല്ല എം.എല്‍ എ എന്നിവര്‍ പങ്കെടുക്കുന്ന പരിപാടിയില്‍ ഫെബ്രുവരി മൂന്നിന് പുസ്തകം പ്രകാശനം ചെയ്യാന്‍ വിപുലമായ ഒരുക്കങ്ങളാണ് നടന്നു കൊണ്ടിരിക്കുന്നത്.