ആര്യനാട്: കോട്ടൂര്‍ കാലന്‍കുഴി ഭാഗങ്ങളില്‍ എക്‌സൈസ് സംഘം നടത്തിയ പരിശോധനയില്‍ 50 ലിറ്റര്‍ കോടയുമായി രണ്ടുപേര്‍ അറസ്റ്റിലായി. കാലന്‍കുഴിയില്‍ ഗോപാലകൃഷ്ണന്‍ നായരുടെ ഉടമസ്ഥതയിലുള്ള വീട്ടില്‍ വീടിന്റെ സൂക്ഷിപ്പുകാരനായ കള്ളിയല്‍ സ്വദേശി രവീന്ദ്രന്‍ (54), ഇയാളുടെ സുഹൃത്തും ഇവിടെ റബര്‍ സ്ലോട്ടര്‍ എടുത്തിട്ടുള്ളയാളുമായ സുബൈര്‍ (47) എന്നിവരാണു പിടിയിലായത്. റബര്‍ ടാപ്പിങ് ജോലിയുടെ മറവില്‍ ഇവിടെ ചാരായംവാട്ടി വരികയായിരുന്നു. ചാരായം വാറ്റാനായി വീട്ടില്‍ സൂക്ഷിച്ചിരുന്ന അന്‍പത് ലിറ്റര്‍ കോടയാണ് എക്‌സൈസ് സംഘം പരിശോധനയില്‍ കണ്ടെടുത്തത്. എക്‌സൈസിനു ലഭിച്ച രഹസ്യവിവരത്തിന്റെ അടിസ്ഥാനത്തിലാണു പരിശോധന നടത്തിയത്.
പ്രിവന്റിവ് ഓഫിസര്‍ ടി.എന്‍ സുധീര്‍ ഖാന്റെ നേതൃത്വത്തില്‍ പ്രിവന്റിവ് ഓഫിസര്‍മാരായ സതീഷ് കുമാര്‍, സിവില്‍ എക്‌സൈസ് ഓഫിസര്‍ എന്‍.ആര്‍ രാജേഷ്, ഡ്രൈവര്‍ എം. റീജകുമാര്‍ എന്നിവര്‍ ചേര്‍ന്നാണു പ്രതികളെ പിടികൂടിയത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.