അഹമ്മദാബാദ്: ഗീര്‍ വനത്തിലെ സിംഹങ്ങള്‍ക്കൊപ്പം സെല്‍ഫിയെടുത്ത് സോഷ്യല്‍ മീഡിയയില്‍ പോസ്റ്റ് ചെയ്ത സംഭവത്തില്‍ ഇന്ത്യന്‍ താരം രവീന്ദ്ര ജഡേജ കുരുക്കില്‍. താരത്തിനെതിരേ വനംവകുപ്പ് അന്വേഷണം ആരംഭിച്ചിട്ടുണ്ട്. ജഡേജയും ഭാര്യ റീവയും സിംഹങ്ങളോടൊത്ത് സെല്‍ഫിക്ക് പോസ് ചെയ്യുന്ന ചിത്രമാണ് താരം ഇന്‍സ്റ്റഗ്രാമില്‍ പോസ്റ്റ് ചെയ്തത്. എന്നാല്‍ വനത്തിനുള്ളില്‍ വാഹനം നിര്‍ത്തി ഫോട്ടോയെടുക്കുന്നത് ഇവിടെ നിരോധിച്ചിരിക്കുകയാണ്. ഈ സാഹചര്യത്തില്‍ ജഡേജയ്ക്ക് ഫോട്ടോയെടുക്കാന്‍ ആരാണ് അനുവാദം നല്‍കിയതെന്നാണ് വനം വകുപ്പ് അധികൃതര്‍ ചോദിക്കുന്നത്.
നേരത്തെ സിംഹങ്ങളോടൊത്ത് സെല്‍ഫിയെടുക്കുന്നത് അപകടകരമാണെന്ന് ഗുജറാത്ത് വനം വകുപ്പ് സന്ദര്‍ശകര്‍ക്ക് മുന്നറിയിപ്പ് നല്‍കിയിരുന്നു. ഗീര്‍ വനത്തിലെ സിംഹങ്ങള്‍ വംശനാശം സംഭവിച്ചു കൊണ്ടിരിക്കുന്ന ഏഷ്യന്‍ സിംഹങ്ങളുടെ വിഭാഗത്തിലുള്ളയാണ്. ഇവ സന്ദര്‍ശകരെ ആക്രമിക്കാറില്ലെങ്കിലും സന്ദര്‍ശകര്‍ സൂക്ഷിക്കണമെന്ന് വനം വകുപ്പിന്റെ നിര്‍ദേശമുണ്ട്. എന്നിട്ടും ചട്ടം ലംഘനം നടത്തിയതിനാല്‍ ജഡേജയ്ക്ക് കുറഞ്ഞത് പിഴ ശിക്ഷയെങ്കിലും നല്‍കുമെന്നാണ് വനം വകുപ്പിന്റെ വിശദീകരണം.