സ്വന്തം ലേഖകന്‍
തൊടുപുഴ: സംസ്ഥാനത്തെ പ്രതിദിന വൈദ്യുതി ഉപയോഗം ഈ വര്‍ഷത്തെ ഉയര്‍ന്ന നിലയില്‍. ഇന്നലെ രാവിലെ ഏഴിന് അവസാനിച്ച 24 മണിക്കൂറിലെ ഉപയോഗം 82.3192 ദശലക്ഷം യൂനിറ്റായിരുന്നു. 2020ലെ ഉയര്‍ന്ന വൈദ്യുതി ഉപയോഗമാണിത്. ഇതില്‍ 63.4335 ദശലക്ഷം യൂനിറ്റ് പുറത്ത് നിന്നെത്തിച്ചപ്പോള്‍ ആഭ്യന്തര ഉല്‍പാദനം 18.8857 ദശലക്ഷം യൂനിറ്റ് ആയിരുന്നു. അതേസമയം ഏറ്റവും വലിയ ജലവൈദ്യുതി പദ്ധതിയായ ഇടുക്കിയുടെ മൂലമറ്റം പവര്‍ ഹൗസിലെ ഉല്‍പാദന നഷ്ടം 200 കോടി കവിഞ്ഞു.
മൂലമറ്റത്തെ തകരാറിലായ ജനറേറ്ററുകളുടെ പ്രവര്‍ത്തനം പുനരാരംഭിക്കുന്നത് ഇനിയും വൈകുമെന്നാണ് നിഗമനം. അറ്റകുറ്റപണികള്‍ പുരോഗമിക്കുകയാണെങ്കിലും തകരാറിന്റെ വ്യാപ്തി കൂടിയതും കൃത്യസമയത്ത് ആവശ്യമായ യന്ത്രഭാഗങ്ങള്‍ കിട്ടാത്തതുമാണ് തിരിച്ചടിയാകുന്നത്. ഇടുക്കിയിലെ 130 മെഗാവാട്ട് വീതം ശേഷിയുള്ള ആറ് ജനറേറ്ററുകളില്‍ ഒന്ന് നവീകരണത്തിലും രണ്ടെണ്ണം തകാരാറിനെ തുടര്‍ന്ന് അറ്റകുറ്റപണിയിലുമാണ്. ജനുവരി 20ന് രാത്രിയിലാണ് രണ്ടാം നമ്പര്‍ ജനറേറ്റര്‍ തകരാറിലായത്. 15 ദിവസം കൊണ്ട് അറ്റകുറ്റപണി തീര്‍ക്കുമെന്ന് പറഞ്ഞിരുന്നെങ്കിലും പണി 50 ദിവസത്തിലധികമായി നീണ്ടുപോവുകയാണ്. ഫെബ്രുവരി ഒന്നിനാണ് ആറാം നമ്പര്‍ ജനറേറ്റര്‍ തകാറിലാകുന്നത്. ഇടുക്കി പദ്ധതിയില്‍ നിലവില്‍ 59 ശതമാനം വെള്ളമുണ്ടായിട്ടും ഇത് ഫലപ്രദമായി ഉപയോഗിക്കാനാകാത്തത് വൈദ്യുതി ബോര്‍ഡിന് കനത്ത തിരിച്ചടിയാണ്. 6.253 ദശലക്ഷം യൂനിറ്റായിരുന്നു മൂലമറ്റത്തെ ഇന്നലത്തെ ഉത്പ്പാദനം.

സംഭരണ ശേഷിയുടെ 57 ശതമാനം വെള്ളം എല്ലാ സംഭരണികളിലുമായി നിലവിലുണ്ട്. ഇതുപയോഗിച്ച് 2343.164 ദശലക്ഷം യൂണിറ്റ് വൈദ്യുതി ഉല്‍പാദിപ്പിക്കാനാകും. കഴിഞ്ഞ വര്‍ഷം ഇതേ ദിവസത്തേക്കാള്‍ 173.506 ദശലക്ഷം യൂനിറ്റ് അധികമാണിത്. കാലവര്‍ഷം എത്താന്‍ ഇനി 81 ദിവസം കൂടി അവശേഷിക്കുന്നുണ്ട്.
അതേ സമയം അന്തരീക്ഷ താപനില കുതിച്ചുയരുന്നതിനാല്‍ വൈദ്യുതി ഉപയോഗം ഇനിയും ഉയരും. പുനലൂരില്‍ കൂടിയ താപനില 39.2 ഡിഗ്രിയിലെത്തി. തൊട്ടുപിന്നില്‍ പാലക്കാടാണ് 37.6 ഡിഗ്രി സെല്‍ഷ്യസ്. താപനില ഉയര്‍ന്നതിനൊപ്പം കുറഞ്ഞ താപനിലയിലും കാര്യമായ വ്യതിയാനം വന്നിട്ടുണ്ട്. ശരാശരി 23-27 നും ഇടയിലാണ് കുറഞ്ഞ താപനില രേഖപ്പെടുത്തുന്നത്. ഇതിനാല്‍ രാത്രി 2 മണിക്ക് ശേഷമാണ് അന്തരീക്ഷത്തില്‍ ചെറിയ തണുപ്പ് അനുഭവപ്പെടുന്നത്.