കോഴിക്കോട്: നാട്ടിലേക്കുള്ള യാത്രക്കിടെ കാണാതായ മലയാളി സൈനികന്‍ വിഷ്ണുവിനെ കണ്ടെത്തി. ഇന്നലെ രാത്രി ബംഗളുരുവില്‍ നിന്നാണ് വിഷ്ണുവിനെ എലത്തൂര്‍ പൊലിസ് കണ്ടെത്തിയത്. സാമ്പത്തികപ്രയാസം കാരണമാണ് നാട്ടില്‍നിന്ന് മാറിനില്‍ക്കേണ്ടിവന്നതെന്ന് പൊലിസ് പറഞ്ഞു. വിഷ്ണുവിനെ ബുധനാഴ്ച നാട്ടിലെത്തിക്കും.

വിഷ്ണുവിന്റെ ചില സുഹൃത്തുക്കളില്‍ നിന്നും കിട്ടിയ വിവരത്തെ തുടര്‍ന്നാണ് പൊലിസ് ബെംഗളുരുവില്‍ എത്തിയത്. എലത്തൂര്‍ സബ് ഇന്‍സ്‌പെക്ടര്‍ മുഹമ്മദ് സിയാദ്, സീനിയര്‍ സിവില്‍ പൊലിസ് ഓഫീസര്‍ അതുല്‍കുമാര്‍, സിവില്‍ പൊലിസ് ഓഫീസര്‍ വൈശാഖ് എന്നിവരടങ്ങിയ സംഘമാണ് വിഷ്ണുവിനെ കണ്ടെത്തിയത്. മൊബൈല്‍ ഫോണ്‍ ഓഫായതിനാല്‍ സി.സി.ടി.വി ക്യാമറകള്‍ കേന്ദ്രീകരിച്ചായിരുന്നു അന്വേഷണം. 

പൂനെ ആര്‍മി സ്‌പോര്‍ട്സ് ഇന്‍സ്റ്റിറ്റ്യൂട്ടില്‍ ജോലിചെയ്യുന്ന ബോക്‌സിങ് താരം കൂടിയായ വിഷ്ണുവിനെ ഡിസംബര്‍ 17-ന് പുലര്‍ച്ചെ മുതലാണ് കാണാതായത്. അവധിക്ക് തിരികെ നാട്ടിലേക്ക് പോന്ന വിഷ്ണു അമ്മയെ വിളിച്ച് കണ്ണൂരിലെത്തിയെന്ന് പറഞ്ഞിരുന്നു. എന്നാല്‍ രാത്രിയായിട്ടും വീട്ടിലെത്താത്തതിനെ തുടര്‍ന്നും ഫോണില്‍ ബന്ധപ്പെടാന്‍ സാധിക്കാതെ വരികയും ചെയ്തതോടെ ബന്ധുക്കള്‍ പൊലിസില്‍ പരാതി നല്‍കുകയായിരുന്നു.