മാനന്തവാടി: ജില്ലാ ആശുപത്രിയില്‍ ഒരു വര്‍ഷത്തോളമായി ഒഴിഞ്ഞ് കിടക്കുന്ന സൂപ്രണ്ട് തസ്തികയിലേക്ക് വീണ്ടും താല്‍ക്കാലിക നിയമനം നടത്താന്‍ അണിയറയില്‍ നീക്കം.
നിലവില്‍ ചുമതല വഹിക്കുന്ന ഡെപ്യൂട്ടി ഡി.എം.ഒ കേഡറിലുള്ള ഡോക്ടറെ ചുമതലയില്‍ നിന്നും നീക്കി ഇതേ കേഡറില്‍ തന്നെയുള്ള മറ്റൊരു ഡോക്ടര്‍ക്ക് ചുതല നല്‍കാനാണ് ഭരണ മാറ്റത്തെ തുടര്‍ന്ന് നീക്കം ആരംഭിച്ചത്. ആശുപത്രിയിലെ പ്രശ്‌നങ്ങള്‍ക്ക് പരിഹാരമുണ്ടാവണമെങ്കില്‍ ഡെപ്യൂട്ടി ഡയറക്ടര്‍ തസ്തികയിലുള്ള ഡോക്ടറെ നിയമിച്ച് പൂര്‍ണ ചുമതല കൈമാറണം. ഇതിന് ശ്രമങ്ങള്‍ നടത്താതെയാണ് ഭരണ പക്ഷത്തിന്റെ പിന്തുണയോടെ നിലവിലെ താല്‍ക്കാലിക സൂപ്രണ്ടിനെ സ്ഥലം മാറ്റി ഇതേ പദവിയിലുള്ള ഡോക്ടര്‍ക്ക് താല്‍ക്കാലിക സൂപ്രണ്ടിന്റെ ചുമതല നല്‍കാന്‍ ശ്രമങ്ങള്‍ നടക്കുന്നത്.
സംസ്ഥാനത്ത് ഡെപ്യൂട്ടി ഡയറക്ടര്‍ കേഡറിലുള്ള നിരവധി പേരുണ്ടെന്നിരിക്കെയാണ് പുതിയ നീക്കം. ഓരേ തസ്തികയിലുള്ളവര്‍ സൂപ്രണ്ടിന്റെ ചാര്‍ജ് വഹിക്കുമ്പോള്‍ മറ്റ് ഡോക്ടര്‍മാര്‍ക്ക് ഉണ്ടാകുന്ന ഈഗോ പ്രശ്‌നങ്ങളും ആശുപത്രിയുടെ സുഗമമായ നടത്തിപ്പിന് തടസ്സമാകാറുണ്ട്. ജില്ലാ ആശുപത്രിയുടെ സുഗമമായ നടത്തിപ്പിന് സ്ഥിരം സൂപ്രണ്ടിനെ നിയമിക്കണമെന്ന് വിവധ കോണുകളില്‍ നിന്ന് ആവശ്യമുയര്‍ന്നിരുന്നു. എന്നാല്‍ ഒരു വര്‍ഷത്തിലധികമായി സ്ഥിരം സൂപ്രണ്ടിനെ നിയമിക്കാന്‍ ആരോഗ്യ വകുപ്പ് അധികൃതര്‍ തയ്യാറായിട്ടില്ല. സ്ഥിരം സൂപ്രണ്ട് ഇല്ലാത്തതിനാല്‍ ആശുപത്രിയുടെ ദൈനം ദിന കാര്യങ്ങള്‍ക്ക് തടസ്സമാകുന്നതിനപ്പുറം വിവിധ ആനുകൂല്യങ്ങള്‍ എന്നിവയുള്‍പ്പടെയുള്ള ആവശ്യങ്ങള്‍ക്കായി ഓഫിസിലെത്തുന്ന സാധാരണക്കാര്‍ക്കും ഏറെ ദുരിതമാണ് അനുഭവിക്കുന്നത്.