തേഞ്ഞിപ്പലം: ത്രിവത്സര എല്‍.എല്‍.ബിയുടെ ആറാം സെമസ്റ്റര്‍ പരീക്ഷ റെക്കോര്‍ഡ് വേഗത്തില്‍ നടത്തിയത് മൂലം നിയമ വിദ്യാര്‍ഥികള്‍ ആശങ്കയില്‍. സാധാരണ ഗതിയില്‍ ജനുവരി മാസത്തില്‍ നടത്താറുള്ള ആറാം സെമസ്റ്റര്‍ പരീക്ഷ രണ്ട് മാസം നേരത്തെ നവംബറില്‍ തന്നെ ആരംഭിക്കുകയും ജനുവരി 25 ന് ഫലപ്രഖ്യാപനവും നടത്തുകയായിരുന്നു.

ബാര്‍ കൗണ്‍സില്‍ ഓഫ് ഇന്ത്യയുടെയും കാലിക്കറ്റ് സര്‍വകലാശാലയുടെയും എല്‍.എല്‍.ബി കോഴ്‌സിന്റെ നിയമാവലിയനുസരിച്ച് ഒരു സെമസ്റ്ററില്‍ 90 പ്രവൃത്തിദിവസം നിര്‍ബന്ധമാണ്. എന്നാല്‍, ഈ വര്‍ഷം കോഴിക്കോട് ഗവണ്‍മെന്റ് ലോ കോളജില്‍ ലഭ്യമായത് ആകെ 66 ദിവസം മാത്രമാണ്. ഇതുമൂലം പ്രസിദ്ധീകരിക്കപ്പെട്ട എല്‍.എല്‍.ബി പരീക്ഷാഫലം ബാര്‍ കൗണ്‍സില്‍ അംഗീകരിക്കുമോ എന്ന ആശങ്കയിലാണ് വിദ്യാര്‍ഥികള്‍.