ആനക്കര: ബൈക്കുകള്‍ കൂട്ടിയിടിച്ച് കെ.എസ്.ഇ.ബി ജീവനക്കാരന് പരുക്കേറ്റു. പടിഞ്ഞാറങ്ങാടി സെക്ഷന്‍ ഓഫിസിലെ ലൈന്‍മാന്‍ കുഴല്‍മന്ദം സ്വദേശി ഉണ്ണികൃഷ്ണന്‍ (40) ആണ് പരുക്കേറ്റത്.
ഇന്നലെ കാലത്ത് എന്‍ജിനീയര്‍ റോഡിലെ ഓഫിസിനു മുന്‍പില്‍വച്ചാണ് അപകടം. ഓഫിസിലേക്ക് തിരിയുന്നതിനിടെ മറ്റൊരു ബൈക്ക് ഉണ്ണികൃഷ്ണനെ ഇടിക്കുകയായിരുന്നു.
ഇയാളെ സാരമായ പരുക്കുകളോടെ തൃശൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. നിത്യേന നിരവധി ആളുകള്‍ എത്തുന്ന ഓഫിസിനു മുന്നിലൂടെയുളള വാഹനങ്ങളുടെ അമിതവേഗം പലപ്പോഴും അപകടത്തിന് വഴിവയ്ക്കുന്നുണ്ട്. റോഡ് നവീകരിച്ചതോടെ മിക്ക വാഹനങ്ങള്‍ക്കും ഇവിടെ അമിതവേഗമാണ്. റോഡിന് ഇറക്കമാണെന്നതും ഇവിടെ അപകടസാധ്യത വര്‍ധിപ്പിക്കുന്നു.