ഈരാറ്റുപേട്ട: വിവിധയിടങ്ങളിലായി അനധികൃത വിദേശമദ്യവില്‍പന നടത്തിയ മൂന്ന് പേരെ ഈരാററുപേട്ട എക്‌സൈസ് സംഘം അറസ്റ്റ് ചെയ്തു.
വീടുകളും വാടകവീടുകളും കേന്ദ്രീകരിച്ചും ഓട്ടോറിക്ഷയിലെത്തിച്ചും മദ്യവില്‍പന നടത്തിവന്നിരുന്നവരാണ് വിവിധയിടങ്ങളില്‍ നിന്നായി പിടിയിലായത്.വീട്ടില്‍ വിദേശമദ്യവില്‍പന നടത്തിവന്നിരുന്ന പിണ്ണാക്കനാട് സ്വദേശി പ്ലാവിളയില്‍ ലിജു ജോസ്, വാടകവീട് കേന്ദ്രീകരിച്ച് മദ്യവില്‍പന നടത്തിയിരുന്ന കളത്തൂക്കടവ് ചാമക്കാലായില്‍ തോമസ്, ഓട്ടോറിക്ഷയില്‍ വിവിധയിടങ്ങളില്‍ മദ്യം ആവശ്യക്കാര്‍ക്ക് എത്തിച്ചുനല്‍കി വന്നിരുന്ന പൂഞ്ഞാര്‍ കല്ലേക്കുളം സ്വദേശി ചിറ്റാനപ്പാറയില്‍ സജി എന്നിവരാണ് ഈരാറ്റുപേട്ട എക്‌സൈസിന്റെ പിടിയിലായത്.
വിവിധ അളവുകളിലുള്ള 20 ലിറ്ററോളം വിദേശമദ്യവും ഇവരില്‍ നിന്നും പിടിച്ചെടുത്തു.ഡ്രൈഡേ ദിവസങ്ങളിലും ബിവറേജസ് ഔട്ട്‌ലെറ്റുകള്‍ പ്രവര്‍ത്തിക്കാത്ത സമയങ്ങളും കേന്ദ്രീകരിച്ച മദ്യവില്‍പനയായിരുന്നു ഇവരുടെ രീതിയെന്ന് എക്‌സൈസ് പറഞ്ഞു.
ഔട്ട്‌ലെറ്റുകളില്‍ നിന്നും വാങ്ങി സൂക്ഷിക്കുന്ന മദ്യം ആവശ്യക്കാര്‍ക്ക് വന്‍ലാഭത്തിലാണ് വില്‍പന നടത്തിയിരുന്നത്. മൂവരെയും ഈരാററുപേട്ട കോടതിയില്‍ ഹാജരാക്കി.