റിയാദ്​: സഊദിയിൽ കോവിഡ് 19 വൈറസ് ബാധിതരുടെ എണ്ണം ഉയർന്നതോടെ പ്രതിരോധ നടപടികളുടെ ഭാഗമായി സഊദിയിലെ  ഇന്ത്യൻ എംബസി മുഴുവൻ കോൺസുലർ സേവനങ്ങളും നിർത്തിവെച്ചു. ഇതിന്റെ ഭാഗമായി വിവിധ കേന്ദ്രങ്ങളിലെ പാസ്​പോർട്ട്​, വിസ സർവീസ്​ കേന്ദ്രങ്ങൾ​ എംബസി അടച്ചു. റിയാദിലെ ഉമ്മുൽ ഹമാം, ബത്ഹ, ദമാം, അൽബാർ, ജുബൈൽ, ബുറൈദ, ഹാഇൽ എന്നിവിടങ്ങളിലുള്ള പാസ്​പോർട്ട്​, വിസ സർവീസ്​ കേന്ദ്രങ്ങളാണ്​ അടച്ചത്. തിങ്കളാഴ്​ച മുതൽ മാസം 31 വരെയാണ് അവധി പ്രഖ്യാപിച്ചത്. 

    പാസ്​പോർട്ട്​ പുതുക്കൽ, പുതിയതിന്​ അപേക്ഷിക്കൽ, വിസയ്​ക്ക്​ അപേക്ഷിക്കൽ, സർട്ടിഫിക്കറ്റ്​ അറ്റസ്​റ്റേഷൻ തുടങ്ങിയ സേവനങ്ങളും  കോൺസുലർ സേവനങ്ങളും ഈ  കാലയളവിൽ ഈ കേന്ദ്രങ്ങളിൽ നിന്ന്​ ലഭിക്കുന്നതല്ല. എന്നാൽ അടിയന്തര ഘട്ടത്തിൽ ഏതെങ്കിലും പ്രത്യേക കോൺസുലർ സർവീസ്​ അത്യാവശ്യമായി വന്നാൽ റിയാദിലെ ഉമ്മുൽ ഹമാമിലെ കേന്ദ്രത്തെ സമീപിക്കാമെന്നും എംബസി അധികൃതർ അറിയിച്ചു.  

     നേരത്തെ, ഇക്കഴിഞ്ഞ വ്യാഴാഴ്ച മുതൽ തന്നെ സഊദിയുടെ വിവിധ ഭാഗങ്ങളിൽ നടത്താറുള്ള പതിവ്​ കോൺസുലർ സന്ദർശന പരിപാടികളും നിർത്തി വെച്ചിരുന്നു. ഹുഫൂഫ്​, ഹഫർ അൽബാത്വിൻ, വാദി്​ അൽദവാസിർ, അറാർ, സകാക്ക, അൽജൗഫ്​, അൽഖഫ്​ജി, അൽഖുറയാത്ത്​ എന്നിവിടങ്ങളിലെ പതിവ്​ സന്ദർശന പരിപാടികളാണ്​ ഇനിയൊരു അറിയിപ്പുണ്ടാകുന്നതുവരെ നിർത്തിവെച്ചത്​.