കോഴിക്കോട്: സംസ്ഥാന ധനകാര്യമന്ത്രി തോമസ് ഐസക് അവതരിപ്പിച്ച ബജറ്റ് കേരളത്തെ നശിപ്പിക്കുകയും ചതിക്കുകയും ചെയ്തുവെന്ന് മുന്‍ മഹാരാഷ്ട്ര ഗവര്‍ണര്‍ കെ.ശങ്കരനാരായണന്‍.

ജനശ്രീ സുസ്ഥിര വികസന മിഷന്‍ 12ാം വാര്‍ഷിക സമ്മേളനം കോഴിക്കോട്ട് ശ്രീനാരായണ സെന്റിനറി ഹാളില്‍ ഉദ്ഘാടനം ചെയ്യുകയായിരുന്നു അദ്ദേഹം.
പത്താം ബജറ്റിന് കേരളത്തിന്റെ സാമ്പത്തിക സ്ഥിതിയുമായി എന്തു ബന്ധമാണുള്ളതെന്ന് മന്ത്രി വ്യക്തമാക്കണം.
പത്തുശതമാനം നികുതി വരുമാനവും 17 ശതമാനം ചെലവും വരുമെന്നാണ് ധനമന്ത്രി പറയുന്നത്.

ബജറ്റില്‍ പ്രഖ്യാപിച്ച 55,000 കോടി രൂപയുടെ ആകാശ റെയില്‍പാത തോമസ് ഐസകിന്റെ ദിവാസ്വപ്നമല്ലെന്നും മരണസ്വപ്നമാണെന്നും അദ്ദേഹം പരിഹസിച്ചു.
കഴിഞ്ഞ രണ്ട് ബജറ്റുകളില്‍ പ്രഖ്യാപിച്ച പദ്ധതികളില്‍ 49 ശതമാനം മാത്രമേ നടപ്പാക്കാന്‍ കഴിഞ്ഞിട്ടുള്ളൂ.

കോടികളുടെ നികുതി പിരിച്ചെടുക്കാനുണ്ടെന്നാണ് പറയുന്നത്. വന്‍കിട കച്ചവടക്കാര്‍ ഉള്‍പ്പെടെയുള്ളവരില്‍നിന്നും വേണ്ട സമയത്ത് നികുതി പിരിച്ചെടുക്കാതെ നികുതി ചോര്‍ച്ച പരിഹരിക്കുമെന്ന് ജനങ്ങളോട് പറയാന്‍ നാണവും മാനവുമുള്ളവര്‍ കുളിച്ച കുളത്തിലെങ്കിലും കുളിച്ച ഒരു ധനമന്ത്രിക്ക് ആവില്ലെന്നും അദ്ദേഹം കുറ്റപ്പെടുത്തി.
ഒരു ശതമാനം പ്രളയസെസ് നല്ലതാണ്. എന്നാല്‍ പ്രളയസെസ് ഏര്‍പ്പെടുത്തുമ്പോള്‍ വില വര്‍ധനവുണ്ടാവില്ലെന്ന് എന്ത് അടിസ്ഥാനത്തിലാണ് മന്ത്രി പറയുന്നതെന്നും അദ്ദേഹം ചോദിച്ചു.