മനാമ: കൊവിഡ് 19 ബാധിച്ച്  ജിസിസി രാഷ്ട്രങ്ങളില്‍ ആദ്യമരണം ബഹ്റൈനില്‍ റിപ്പോർട്ട് ചെയ്തു. 65കാരിയായ ബഹ്റൈന്‍ പൗരയാണ്  ഐസലേഷന്‍ വാര്‍ഡില്‍ വെച്ച് മരണപ്പെട്ടത്.

വൈറസ് ബാധയ്ക്ക് മുന്‍പ് തന്നെ ഇവര്‍ക്ക് മറ്റു രോഗങ്ങളുമുണ്ടായിരുന്നതായാണ് വിവരം. ഇവരുടെ ആരോഗ്യനില കഴിഞ്ഞ ദിവസങ്ങളില്‍ മോശമായി തുടരുകയായിരുന്നുവെന്നും റിപ്പോര്‍ട്ടുണ്ട്.

ബഹ്റൈനില്‍ എത്തുന്നതിനു മുന്പെ ഇറാനില്‍ വെച്ചാണ് ഇവര്‍ക്ക് വൈറസ് ബാധയേറ്റതെന്നാണ് റിപ്പോര്‍ട്ട്. ദിവസങ്ങള്‍ക്കു മുന്പ് കണക്ടഡ് വിമാനത്തില്‍ ബഹ്‌റൈനിലെത്തിയ ഇവരെ വിമാനത്താവളത്തില്‍ വെച്ച് തന്നെ ഐസലേഷന്‍ വാര്‍ഡിലേക്ക് മാറ്റിയിരുന്നു. ഇവിടെ നടന്ന പരിശോധനയിലാണ് വൈറസ് ബാധയേറ്റ് ഗുരുതരാവസ്ഥയിലെത്തിയത് തിരിച്ചറിഞ്ഞത്. ഇക്കാരണത്താല്‍ പ്രത്യേക പരിചരണവും നിരീക്ഷണവും ഇവര്‍ക്കുണ്ടായിരുന്നു.

ബഹ്റൈനില്‍ ഗുരുതരാവസ്ഥയില്‍ കഴിയുന്ന രണ്ടു പേരില്‍ ഒരാളായിരുന്നു മരണപ്പെട്ട സ്ത്രീ. ഇവരുടെ മരണത്തില്‍ ആരോഗ്യ വകുപ്പ് കുടുംബത്തെ അനുശോചനമറിയിച്ചു. ഈ സ്ത്രീ ബഹ്റൈനില്‍ പൊതുജനങ്ങളുമായി സമ്പര്‍ക്കം പുലര്‍ത്തിയിട്ടില്ലെന്നും ആശങ്കവേണ്ടെന്നും അധികൃതര്‍ അറിയിച്ചിട്ടുണ്ട്.

നിലവില്‍ ചികിത്സയിലുള്ള കൊറോണ രോഗികളിൽ ഒരാള്‍ ഒഴികെ മറ്റാരുടെയും നില ഗുരുതരമല്ല. ഇതുവരെ ബഹ്‌റൈനില്‍ കൊവിഡ് 19 ടെസ്റ്റ് നടന്നത് 12131 പേരിലാണ്. ഇവരില്‍ 11988 പേരുടെയും പരിശോധനാ ഫലം നെഗറ്റീവാണ്. രോഗ ബാധിതരുടെ വിവരങ്ങള്‍ തത്സമയം ലഭ്യമാക്കാനും ആരോഗ്യമന്ത്രാലയത്തിന്റെ നിര്‍ദേശങ്ങള്‍
പൊതുജനങ്ങള്‍ക്കറിയാനുമായി www.moh.gov.bh/COVID19 എന്ന വെബ്‌സൈറ്റും ബഹ്റൈന്‍ ആരോഗ്യമന്ത്രാലയത്തിനു കീഴില്‍ പ്രവര്‍ത്തിക്കുന്നുണ്ട്. ജിസിസിയിലെ ആദ്യ മരണം റിപ്പോര്‍ട്ട് ചെയ്തതോടെ അതീവ ജാഗ്രതയിലാണ് ബഹ്റൈന്‍ ആരോഗ്യ മന്ത്രാലയം.