തിരുവനന്തപുരം: കൊവിഡ് 19 നെ പ്രതിരോധിക്കാന്‍ കേരളം ശ്രമിക്കുമ്പോള്‍ അതിനെ അവഹേളിക്കുന്ന തരത്തിലുള്ള നടപടിയാണ് രജിത് കുമാറിനുവേണ്ടി ആള്‍ക്കൂട്ടം നടത്തിയതെന്ന് മന്ത്രി കടകംപള്ളി സുരേന്ദ്രന്‍. 

ഇതിനു നേതൃത്വം നല്‍കിയവര്‍ക്കെതിരേ നിയമനടപടി സ്വീകരിക്കാന്‍ സംസ്ഥാന സര്‍ക്കാര്‍ തീരുമാനിച്ചിട്ടുണ്ടെന്നും അദ്ദേഹം പ്രസ്താവനയില്‍ അറിയിച്ചു.

ആളുകള്‍ കൂട്ടംകൂടുന്നതും അടുത്തിടപഴകുന്നതും കൊവിഡ് 19 രോഗബാധ നിയന്ത്രണാതീതമാകുന്നതിന് ഇടയാക്കുമെന്ന് ലോകമാകെയുള്ള ആരോഗ്യപ്രവര്‍ത്തകര്‍ മുന്നറിയിപ്പു നല്‍കിയിട്ടുള്ളതാണ്. 

ഇതനുസരിച്ചുള്ള മുന്‍കരുതലുകള്‍ സംസ്ഥാനത്തുടനീളം സ്വീകരിക്കുമ്പോഴാണ് ആരാധകര്‍ എന്ന പേരില്‍ ഒരു കൂട്ടം ആളുകള്‍ ഈ കോപ്രായം കാണിച്ചത്. ഇതിനി സംസ്ഥാനത്ത് എവിടെയെങ്കിലും ആവര്‍ത്തിക്കാന്‍ ശ്രമം ഉണ്ടായാല്‍ ശക്തമായ നടപടിയുണ്ടാകുമെന്നും മന്ത്രി വ്യക്തമാക്കി.