നെടുമ്പാശ്ശേരി: യാത്രക്കാരന് നെഞ്ചു വേദന അനുഭവപ്പെട്ടതിനെ തുടര്‍ന്ന് ജക്കാര്‍ത്തയില്‍ നിന്നും ദുബൈയിലേക്ക് പോകുകയായിരുന്ന വിമാനം നെടുമ്പാശ്ശേരിയില്‍ അടിയന്തര ലാന്റിങ് നടത്തി. യാത്രക്കാരനെ ഉടനെ തന്നെ അങ്കമാലിയിലെ സ്വകാര്യ ആശുപത്രിയില്‍ എത്തിച്ചെങ്കിലും രക്ഷിക്കാന്‍ കഴിഞ്ഞില്ല. എമിറേറ്റ്‌സ് എയര്‍ലൈന്‍സ് വിമാനമാണ് ഇന്നലെ പുലര്‍ച്ചെ 4.30 ന് നെടുമ്പാശ്ശേരി വിമാനത്താവളത്തില്‍ ഇറക്കിയത്. ഇന്തോനേഷ്യന്‍ സ്വദേശി വിദോദോ ഹെറിയാന്റോ സൊപ്പിനോ (52) ആണ് മരിച്ചത്. യാത്രക്കിടയില്‍ ഇദ്ദേഹത്തിന് ദേഹാസ്വാസ്ഥ്യം അനുഭവപ്പെടുകയായിരുന്നു. ഇതേ തുടര്‍ന്ന് പൈലറ്റ് നെടുമ്പാശ്ശേരി വിമാനത്താവളത്തിലെ കണ്‍ട്രോള്‍ റൂമിലേക്ക് സന്ദേശം കൈമാറി അടിയന്തര ലാന്റിങിന് അനുമതി തേടുകയായിരുന്നു. മൃതദേഹം ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. നാട്ടില്‍ നിന്നും ബന്ധുക്കള്‍ എത്തിയ ശേഷം തുടര്‍ നടപടികള്‍ സ്വീകരിക്കും.