തൃശ്ശൂര്‍: കൊവിഡ് 19 രോഗം ചികിത്സിച്ച് ഭേദമാക്കുമെന്ന വാഗ്ദാനവുമായി ചികിത്സ നടത്തിയ മോഹനന്‍ വൈദ്യരെ പൊലിസ് അറസ്റ്റ് ചെയ്തു. രോഗം ചികിത്സിച്ച് മാറ്റാമെന്ന അവകാശവാദത്തെത്തുടര്‍ന്ന് തൃശൂരിലെ പരിശോധനാ കേന്ദ്രത്തില്‍ പൊലിസും ആരോഗ്യവകുപ്പിന്റെയും നേതൃത്വത്തിലാണ് റെയ്ഡ് നടത്തിയത്. തൃശ്ശൂര്‍ പട്ടിക്കാട് പാണഞ്ചേരിയിലുള്ള രായിരത്ത് റിസോര്‍ട്ടിലായിരുന്നു മോഹനന്‍ വൈദ്യരുടെ പരിശോധന.
ഇതിനെത്തുടര്‍ന്നാണ് മോഹനന്‍ വൈദ്യരെ അറസ്റ്റ് ചെയ്തത്. ചികിത്സ നടത്തുന്നതിന് ഇദ്ദേഹത്തിന് ലൈസന്‍സുണ്ടായിരുന്നില്ല. അതുകൊണ്ടുതന്നെ ജാമ്യമില്ലാ വകുപ്പ് ചുമത്തിയാണ് അറസ്റ്റ് ചെയ്തത്. കൊവിഡ് 19-ന് വ്യാജ ചികിത്സ നടത്തുന്നുവെന്ന രഹസ്യവിവരത്തിന്റെ അടിസ്ഥാനത്തിലായിരുന്നു ആരോഗ്യവകുപ്പിന്റെ നടപടി.

എന്ത് ചികിത്സയാണ് മോഹനന്‍ വൈദ്യര്‍ നല്‍കുന്നതെന്ന വിവരങ്ങള്‍ ഡി.എം.ഒയും പൊലിസും നേരിട്ടെത്തി പരിശോധിക്കുകയായിരുന്നു. ഹെറിറ്റേജിലെ സഞ്ജീവനി ആയുര്‍ സെന്ററില്‍ ഇന്ന് ചികിത്സയുണ്ടാകുമെന്നും, അതിനായി ബന്ധപ്പെടേണ്ട നമ്പറും മോഹനന്‍ വൈദ്യര്‍ ഫേസ്ബുക്ക് പേജില്‍ പങ്കുവച്ചിരുന്നു.

ചികിത്സാപ്പിഴവ് മൂലം ഒന്നര വയസ്സുകാരി മരിച്ചതുള്‍പ്പടെ നിരവധി പരാതികളുയര്‍ന്നിരുന്നു ഇദ്ദേഹത്തിനുനേരെ. വൈറസ് രോഗബാധകള്‍ക്ക് ആധുനിക ശാസ്ത്രം പറയുന്ന മരുന്നുകള്‍ ഉപയോഗിക്കരുതെന്നും പാരമ്പര്യ വൈദ്യം മാത്രമാണ് പോംവഴിയെന്നും പറയുന്ന നിരവധി വീഡിയോകളാണ് മോഹനന്‍ വൈദ്യരുടെ ഫേസ്ബുക്ക് പേജിലുള്ളത്. നരഹത്യ ഉള്‍പ്പടെ ചുമത്തി മോഹനന്‍ വൈദ്യരെ നേരത്തേ പൊലിസ് അറസ്റ്റ് ചെയ്തിരുന്നു.