മാന്നാര്‍: അപ്പര്‍കുട്ടനാടന്‍ പാടശേഖരങ്ങളില്‍ ജലക്ഷാമം രൂക്ഷമായി. കര്‍ഷകര്‍ സ്വന്തം ചിലവില്‍ മോട്ടറുകള്‍ സ്ഥാപിച്ച് പമ്പിംഗ് തുടങ്ങി. കഴിഞ്ഞ ദിവസം വിത പൂര്‍ത്തിയാക്കിയ വേഴത്താറടക്കമുള്ള പാടശേഖരങ്ങളിലെല്ലാം ഇന്ന് വെള്ളമില്ലാത്ത അവസ്ഥയാണ്.
സ്വന്തം ചെലവില്‍ വലിയ മോട്ടോറുകള്‍ സ്ഥാപിച്ച് വെള്ളമെത്തിക്കാനുള്ള ശ്രമങ്ങള്‍ മിക്ക പാടശേഖരങ്ങളിലും ആരംഭിച്ചുകഴിഞ്ഞു. വേനലിന്റെ കാഠിന്യം കൂടുംതോറും പാടങ്ങളിലേയും ജലം വറ്റുകയാണ്.
പമ്പാ ഇറിഗേഷന്‍ കനാലില്‍ വെള്ളമെത്തിയെങ്കിലും മാന്നാര്‍ ചെന്നിത്തല ഭാഗങ്ങളിലെ 6000 ഏക്കര്‍ വരുന്ന പാടശേഖരത്തില്‍ ഇതുവരെ ഒരു തുള്ളി വെള്ളം പോലും എത്തിയിട്ടില്ലെന്നാണ് കര്‍ഷകരുടെ പരാതി.പ്രശ്‌നത്തിന് പരിഹാരമായില്ലെങ്കില്‍ സംയുക്ത പാടശേഖര സമിതിയുടെ നേതൃത്വത്തില്‍ സമരപരിപാടികള്‍ക്ക് രൂപം നല്‍കുമെന്ന് സെക്രട്ടറി സ്റ്റീഫന്‍ തോമസ് അറിയിച്ചു.