ന്യൂഡല്‍ഹി: വടക്കുകിഴക്കന്‍ ഡല്‍ഹിയില്‍ മുസ്‌ലിംകള്‍ക്കു നേരെ സംഘ്പരിവാര്‍ നേതൃത്വത്തില്‍ നടന്ന വംശഹത്യയില്‍ കൊല്ലപ്പെട്ടവരുടെ മൃതശരീരങ്ങളുടെ ഡി.എന്‍.എ ടെസ്റ്റ് വൈകുന്നതിനെതിരേ കോടതി. കോടതി ഉത്തരവിന് കാത്തുനില്‍ക്കാതെ മൃതദേഹങ്ങളുടെ ഡി.എന്‍.എ ടെസ്റ്റ് നടത്താന്‍ ഡല്‍ഹി ഹൈക്കോടതി അധികൃതരോട് നിര്‍ദേശിച്ചു.

കോടതി നിര്‍ദേശിച്ചിട്ടില്ലെന്നു ചൂണ്ടിക്കാട്ടി ഡി.എന്‍.എ ടെസ്റ്റ് വൈകിപ്പിക്കുന്നുണ്ടെന്നു ചൂണ്ടിക്കാട്ടി സമര്‍പ്പിക്കപ്പെട്ട ഹരജിയിലാണ് കോടതി നിര്‍ദേശം. കേസുകളുടെ പ്രാധാന്യമനുസരിച്ച് എത്രയും വേഗത്തില്‍ നടപടികള്‍ പൂര്‍ത്തിയാക്കണമെന്നും ഡി.എന്‍.എ ടെസ്റ്റ് നടത്തുന്നതിനായി കോടതി ഉത്തരവിനായി കാത്തുനില്‍ക്കേണ്ടതില്ലെന്നും കോടതി ചൂണ്ടിക്കാട്ടി.തിരിച്ചറിയപ്പെടാത്ത മൃതദേഹങ്ങള്‍ ആരുടേതാണെന്ന കാര്യത്തില്‍ തീര്‍പ്പുവേണമെന്നാവശ്യപ്പെട്ട് കാണാതായവരുടെ ബന്ധുക്കളും കോടതിയെ സമീപിച്ചിരുന്നു. 15 ദിവസത്തിനുള്ളില്‍ ഇക്കാര്യത്തില്‍ തീരുമാനമെടുക്കാനാണ് അധികൃതരോട് കോടതി നിര്‍ദേശിച്ചിരിക്കുന്നത്.ഡല്‍ഹിയില്‍ ആഴ്ചകള്‍ക്കു മുന്‍പ് നടന്ന വംശീയാതിക്രമത്തില്‍ അന്‍പതിലേറെ പേര്‍ കൊല്ലപ്പെടുകയും ഇരുനൂറിലേറെ പേര്‍ക്കു പരുക്കേല്‍ക്കുകയും ചെയ്തിരുന്നു.