ജിദ്ദ: സാധാരണ പ്രവര്‍ത്തകനായി രാഷ്ട്രീയ ജീവിതമാരംഭിച്ച വിശ്വത്തോളം വളര്‍ന്ന നേതാവാണ് ഇ.അഹമ്മദ് സാഹിബ് ഇന്ത്യയിലെ ജനാധിപത്യ സംവിധാനത്തില്‍ ഓരോ സാധാരണക്കാരനും മാതൃകയാക്കാന്‍ കഴിയുന്ന ജീവിതമാണ് അഹമ്മദ് സാഹിബിന്റെ ജീവിതമെന്നും മദീന കെ.എം.സി.സി സംഘടിപ്പിച്ച അഹമ്മദ് സാഹിബ് അനുസ്മരണം അഭിപ്രായപെട്ടു.

കെ.എം.സി.സി ഓഫിസില്‍ നടന്ന അനുസ്മരണ ചടങ്ങില്‍ സഊദി കെ.എം.സി.സി നാഷണല്‍ സെക്രട്ടേറിയറ്റ് മെമ്പറും യാമ്പു കെ.എം.സി.സി നേതാവുമായ നാസര്‍ നടുവില്‍ അനുസ്മരണ പ്രഭാഷണം നടത്തി. പ്രവാസികള്‍ക്ക് എന്നും പ്രിയങ്കരനായ നേതാവായിരുന്നു അഹമ്മദ് സാഹിബെന്നും ജീവിതാവസാനംവരെ ഫാസിസത്തിനെതിരേ പടപൊരുതി ജീവിതം ഹോമിച്ച നേതാവായിരുന്നു അദ്ദേഹമെന്ന് നാസര്‍ നടുവില്‍ അനുസ്മരണ പ്രഭാഷണത്തില്‍ ഓര്‍മ്മിപ്പിച്ചു.

റഷീദ് പേരാമ്പ്രയുടെ അധ്യക്ഷതയില്‍ ചേര്‍ന്ന ചടങ്ങില്‍ 'പ്രവാസിയുടെ കുടുംബജീവിതം' എന്ന വിഷയത്തില്‍ ഫാറൂഖ് ട്രെയിനിങ് കോളേജ് അധ്യാപകനും കേരളത്തിലെ അറിയപെടുന്ന മോട്ടിവേറ്ററുമായ ജൗഹര്‍ മുനവ്വര്‍ ക്ലാസെടുത്തു മാറുന്ന ലോകത്ത് കുടുംബ ബന്ധങ്ങളുടെ ഊഷ്മളത നിലനിര്‍ത്തണമെങ്കില്‍ ആത്മാര്‍ത, അടുപ്പം, ഷെയറിംഗ് എന്നിവ കുടുംബ ബന്ധങ്ങളില്‍ കൂടുതല്‍ കരുതലോടെ ഉണ്ടാവണമെന്നും പ്രവാസിലോകം ബന്ധങ്ങളില്‍ കൂടുതല്‍ സൂക്ഷ്മത പുലര്‍ത്തണമെന്നും അദ്ദേഹം ഉണര്‍ത്തി. ഷെരീഫ് കാസര്‍ക്കോട് സ്വാഗതവും ഫൈസല്‍ വെളിമുക്ക് നന്ദിയും പറഞ്ഞു. അസ്‌കര്‍ തിരുമിറ്റക്കോട് ഖിറാഅത്ത് നടത്തി.