ഓണ്‍ലൈന്‍ ഷോപ്പിങ് പ്ലാറ്റ്‌ഫോമായ ആമസോണിന്റെ പേരില്‍ പുതിയ തട്ടിപ്പ് നടക്കുന്നതായി മുന്നറിയിപ്പ്. ഓര്‍ഡര്‍ ചെയ്യാത്ത സാധനങ്ങള്‍ ഉപഭോക്താക്കളുടെ പേരില്‍ അയച്ച് പണം തട്ടുന്നതാണ് തട്ടിപ്പുകാരുടെ രീതി. സാധനങ്ങള്‍ ഡെലിവറി ചെയ്യുന്ന സമയത്ത് പണം നല്‍കണമെന്ന് ആവശ്യപ്പെടും.

ഉപയോക്താക്കള്‍, മറ്റാരെങ്കിലും സാധനങ്ങള്‍ അയച്ചിട്ടുണ്ടാകുമെന്ന് വിശ്വസിച്ച് പണം നല്‍കും. എന്നാല്‍ പാഴ്‌സലുകള്‍ തുറന്നാല്‍ ലഭിക്കുന്നത് കുറഞ്ഞ മൂല്യമുള്ള വസ്തുക്കളാകും. ഇവയ്ക്ക് വന്‍തുകയായിരിക്കും ഇടാക്കുക. നോയിഡയിലെ സെക്ടര്‍ 82, ഉദ്യോഗ് വിഹാര്‍ സൊസൈറ്റിയില്‍ അടുത്തിടെ സമാനമായ തട്ടിപ്പ് നടന്നിരുന്നു.ആമസോണില്‍ നിന്ന് ഒരു പാഴ്‌സല്‍ ഉണ്ടെന്ന് പറഞ്ഞ് ഡെലിവറി ബോയ് പണം തട്ടിച്ച് മടങ്ങുകയായിരുന്നു. സംഭവത്തില്‍ ആമസോണിന്റെ ഉപഭോക്തൃ സേവനവുമായി ബന്ധപ്പെട്ടപ്പോള്‍ സാധനം അയച്ച ആളുടെ വിശദാംശങ്ങളൊന്നും കണ്ടെത്താന്‍ കഴിഞ്ഞില്ല.