മാറഞ്ചേരി: വെളിയങ്കോട് ഗ്രാമപഞ്ചായത്ത് ഓഫിസില്‍ യുവാവിന്റെ ആത്മഹത്യാശ്രമം. റേഷന്‍ കാര്‍ഡ് മുഗണനാ ലിസ്റ്റില്‍ ഉള്‍പ്പെടാത്തതിനെ തുടന്നാണയിരുന്നു ആത്മഹത്യാ ശ്രമം. വെളിയങ്കോട് നേര്‍ച്ചയുമായി ബന്ധപ്പെട്ടു മാലിന്യ പ്രശ്‌നങ്ങള്‍ ചര്‍ച്ച ചെയ്യാന്‍ പഞ്ചായത്ത് പ്രസിഡന്റ് വിളിച്ചുചേര്‍ത്ത യോഗത്തിനിടയിലേക്കാണ് ദേഹം മുഴുവന്‍ പെട്രോളൊഴിച്ച് കൈയില്‍ ലൈറ്ററുമായി ജലീല്‍ ചക്കരമാക്കല്‍ എന്നയാള്‍ ഓടിക്കയറിയത്. യോഗസ്ഥലത്തുവച്ച് തീകൊളുത്താനൊരുങ്ങിയ ഇയാളെ ഗ്രാമപഞ്ചായത്ത് അംഗങ്ങള്‍ കീഴ്‌പ്പെടുത്തുകയായിരുന്നു. മുന്‍ഗണനാ റേഷന്‍ കാര്‍ഡ് ലഭിക്കാന്‍ പഞ്ചായത്ത് അധികൃതര്‍ ഒന്നും ചെയ്തില്ലെന്നാരോപിച്ചായിരുന്നു ആത്മഹത്യാ ശ്രമം. സ്ഥലത്തെത്തിയ പെരുമ്പടപ്പ് പൊലിസ് ഇയാളെ കസ്റ്റഡിയിലെടുത്തു. പഞ്ചായത്ത് പ്രസിഡന്റിന്റെ പരാതിയില്‍ കേസെടുത്തിട്ടുണ്ട്.