കൊല്ലം: റോഡ്‌യാത്ര അപകടരഹിതമാക്കാനുള്ള വഴികള്‍ തെളിയിച്ച് സുരക്ഷാവാരാചരണം ജില്ലയില്‍ തുടരുന്നു. വിവിധ ഏജന്‍സികളുടെ സഹകരണത്തോടെ മോട്ടര്‍വാഹന വകുപ്പാണ് പ്രവര്‍ത്തനങ്ങള്‍ ഏകോപിപ്പിക്കുന്നത്. ഇന്ന് രാവിലെ പത്തിന് എന്‍.സി.സി കേഡറ്റുകള്‍ ആര്‍.ടി ഓഫിസിന്റെ നേതൃത്വത്തിലാണ് ബൈപാസില്‍ ബോധവല്‍ക്കരണം നടത്തുക. ഉച്ചയ്ക്ക് രണ്ടിന് ഓട്ടോറിക്ഷ ഡ്രൈവര്‍മാര്‍ക്കായി പ്രശ്‌നോത്തരിയും ഫസ്റ്റ് റെസ്‌പോണ്ടര്‍ പരിശീലനവും റെഡ്‌ക്രോസ് ഹാളില്‍ നടത്തും. വൈകിട്ട് അഞ്ചിന് ജില്ലാ കലക്ടര്‍ ഡോ. എസ്. കാര്‍ത്തികേയന്റെ സാന്നിധ്യത്തില്‍ ബൈപാസില്‍ റോഡ് സുരക്ഷാ പരിപാടി നടത്തും.
നാളെ രാവിലെ 9.30 ന് സൗജന്യ നേത്ര പരിശോധന ക്യാംപും തിമിര ശസ്ത്രക്രിയ രജിസ്‌ട്രേഷനും കണ്ണട വിതരണവും പത്തിന് എന്‍.എസ്.എസ് വള@ിയര്‍മാരും ആര്‍.ടി.ഒയുടെ ടീമും ചേര്‍ന്ന് ബൈപാസില്‍ ബോധവല്‍ക്കരണ പരിപാടി സംഘടിപ്പിക്കും.
എട്ടിന് രാവിലെ 9.30ന് ചന്ദനത്തോപ് ഐ.ടി.ഐ യില്‍ റോഡ് സുരക്ഷാ ബോധവല്‍ക്കരണവും പ്രഥമ ശുശ്രൂഷാ പരിശീലനവും നടത്തും. ഉച്ചയ്ക്ക് ഒന്നിന് റോഡ് സുരക്ഷാ ക്വിസ് പ്രോഗ്രാം റെഡ് ക്രോസ് ഹാളില്‍. വൈകിട്ട് ആറിന് ബൈപാസില്‍ ട്രാക്ക് വള@ിയര്‍മാരും ആര്‍.ടി.ഒയുടെ സംഘവും ചേര്‍ന്നുള്ള റോഡ് സുരക്ഷാ പരിപാടി.
ഒന്‍പതിന് രാവിലെ 9.30ന് കെ.എസ.്എസ്.ഐ.എ ഹാളില്‍ ഡ്രൈവിങ് സ്‌കൂളുകാര്‍ക്കായി ബോധവല്‍ക്കരണ ക്ലാസും വൈകിട്ട് മൂന്നിന് കരുനാഗപ്പള്ളി മുതല്‍ കൊല്ലം വരെ ട്രാഫിക് സൈന്‍ ബോര്‍ഡുകള്‍ വൃത്തിയാക്കുന്ന പരിപാടിയുമുണ്ടാകും.
സമാപന ദിവസമായ പത്തിന് രാവിലെ 6.30ന് ആര്‍.ടി.ഒ യുടെ നേതൃത്വത്തില്‍ ട്രാക്ക്, ഭാരത് പെട്രോളിയം കമ്പനി എന്നിവയ്‌ക്കൊപ്പം ജനകീയ പങ്കാളിത്തത്തോടെ സേഫത്തോണ്‍ സുരക്ഷാ ബോധവല്‍ക്കരണ കൂട്ടയോട്ടം നടത്തും. വൈകിട്ട് 6.30ന് കൊല്ലം ബീച്ചില്‍ റോഡ് സുരക്ഷാ ഫിലിം പ്രദര്‍ശനവും നടത്തും.കൊട്ടാരക്കരയിലാണ് മുപ്പതാമത് റോഡ് സുരക്ഷാ വാരാചരണത്തിന്റെ സമാപന സമ്മേളനം നടക്കുക.