ന്യൂഡല്‍ഹി: ആര്‍ട്ടിക്കിള്‍ 370 റദ്ദാക്കിയതിനെ തുടര്‍ന്ന് തടങ്കലിലായ ജമ്മുകശ്മിര്‍ മുന്‍മുഖ്യമന്ത്രി ഉമര്‍ അബ്ദുല്ലയെ മോചിപ്പിച്ചു.

ഉമര്‍ അബ്ദുല്ലയെ മോചിപ്പിക്കുന്നതിനെക്കുറിച്ച് നിലപാട് അറിയിക്കണമെന്ന് കേന്ദ്ര സര്‍ക്കാരിനോടും ജമ്മു കശ്മീര്‍ ഭരണകൂടത്തോടും സുപ്രിം കോടതി ആവശ്യപ്പെട്ടിരുന്നു. ജമ്മു കശ്മീരിന് പ്രത്യേക അധികാരങ്ങള്‍ നല്‍കിയിരുന്ന ആര്‍ട്ടിക്കിള്‍ 370 റദ്ദാക്കിയതിന് പിന്നാലെ കഴിഞ്ഞ വര്‍ഷം ആഗസ്റ്റ് മുതല്‍ ഉമര്‍ അബ്ദുല്ല തടവില്‍ കഴിയുകയായിരുന്നു.

'കഴിഞ്ഞ വര്‍ഷം ആഗസ്റ്റ് 5 മൂതല്‍ ഇന്നു വരെ 232 ദിവസം തടങ്കല്‍ പൂര്‍ത്തിയാക്കി മടങ്ങുമ്പോള്‍ ലോകം തന്നെ മാറിയതായി തോന്നുന്നു' മോചനത്തിനുശേഷം അദ്ദേഹം ട്വിറ്ററില്‍ കുറിച്ചു.

ആര്‍ട്ടിക്കിള്‍ 370 പ്രകാരം കശ്മീരിന്റെ പ്രത്യേക പദവി നീക്കിയതിന് പിന്നാലെ 400 ഓളം രാഷ്ട്രീയ നേതാക്കളാണ് വീടുകളിലും ജയിലുകളിലും ആയി കശ്മീരില്‍ തടവിലായത്.