കോഴിക്കോട്: ബ്രൗണ്‍ ഷുഗര്‍ വില്‍പനയ്ക്കിടെ യുവാവ് മാറാട് പൊലിസിന്റെ പിടിയില്‍. മണലൊടിവയലില്‍ പുത്തലത്ത് വീട്ടില്‍ ഷഫീഖ് (30) ആണ് പിടിയിലായത്. വിദ്യാര്‍ഥികളെ ലക്ഷ്യംവച്ചാണ് ഇയാള്‍ ബ്രൗണ്‍ ഷുഗര്‍ വില്‍പന നടത്തുന്നതെന്ന് പൊലിസ് പറഞ്ഞു.
കഞ്ചാവും ലഹരിഗുളികകളും നല്‍കിയ ശേഷം ബ്രൗണ്‍ഷുഗര്‍ ഇഞ്ചക്ഷന്‍ നല്‍കി കുട്ടികളെ ലഹരിക്ക് അടിമപ്പെടുത്തുകയാണു ഇയാളുടെ രീതി. ഫറോക്ക്, ബേപ്പൂര്‍, മാറാട് ഭാഗങ്ങളില്‍ സ്‌കൂള്‍, കോളജ് വിദ്യാര്‍ഥികളാണ് ഇരകള്‍. ഒരുതവണ ഇഞ്ചക്ഷന്‍ എടുക്കുന്നതിന് 1000 മുതല്‍ 2000 രൂപ വരെ ഇയാള്‍ ഈടാക്കുന്നതായും പൊലിസ് പറയുന്നു. മാറാട് എസ്.ഐ കെ.എക്‌സ് തോമസിന്റെ ആസൂത്രിതമായ നീക്കത്തിലാണു പ്രതി മാറാട് മുണ്ടകന്‍പാടത്തുവച്ച് പിടിയിലായത്. സിറ്റി പൊലിസ് കമ്മിഷണര്‍ സഞ്ജയ്കുമാര്‍ ഗുരുദിന്റെ നിര്‍ദേശപ്രകാരം ലഹരി മാഫിയകള്‍ക്കെതരേ ശക്തമായ നടപടികളുമായാണു പൊലിസ് മുന്നോട്ടു പോകുന്നത്.
നിരവധി പിടിച്ചുപറി കേസിലും ഇയാള്‍ നേരത്തെ പ്രതിയാണ്. സീനിയര്‍ സി.പി.ഒ പി. മുഹമ്മദ്, സി.പി.ഒമാരായ എ. പ്രശാന്ത് കുമാര്‍, കെ.എം മനോജ് കുമാര്‍, സരീഷ് പെരുമ്പുഴക്കാട്, സാദിഖ് അലി എന്നിവര്‍ അന്വേഷണ സംഘത്തിലുണ്ടായിരുന്നു.