കോഴിക്കോട്: കേന്ദ്ര സര്‍ക്കാര്‍ ജീവനക്കാര്‍ക്കും പെന്‍ഷന്‍കാര്‍ക്കും അവരുടെ കുടുംബാംഗങ്ങള്‍ക്കും സഹായകരമാകുന്ന സി.ജി.എച്ച്.എസ് വെല്‍നസ് സെന്റര്‍ (അലോപ്പതി) കോഴിക്കോട്ട് അരംഭിക്കാന്‍ അനുമതി ലഭിച്ചതായി എം.കെ രാഘവന്‍ എം.പി അറിയിച്ചു.
കേന്ദ്ര ആരോഗ്യമന്ത്രാലയത്തില്‍ നിന്ന് ഇതുസംബന്ധിച്ച ഉത്തരവ് എം.കെ രാഘവന് നേരിട്ടു കൈമാറി. വെല്‍നസ് സെന്ററിന്റെ ആസ്ഥാനം കോഴിക്കോട് ബൈപാസിലെ ഹൗസിങ് ഫെഡിന്റെ വാടകക്കെട്ടിടത്തില്‍ ആരംഭിക്കാനുള്ള നടപടിക്രമങ്ങള്‍ പുരോഗമിച്ചുവരികയാണ്.
നിലവില്‍ മലബാറിലെ കേന്ദ്ര സര്‍ക്കാര്‍ ജീവനക്കാരും പെന്‍ഷന്‍കാരും തിരുവനന്തപുരത്തുള്ള സി.ജി.എച്ച്.എസ് വെല്‍നസ് സെന്ററിനെയാണ് ആശ്രയിക്കുന്നത്. വെല്‍നസ് സെന്റര്‍ കോഴിക്കോട്ട് പ്രവര്‍ത്തനമാരംഭിക്കുന്നതോടെ കോഴിക്കോട്ടും സമീപ ജില്ലകളിലുള്ളവര്‍ക്കും കോഴിക്കോട്ടെ എംപാനല്‍ ചെയ്തിട്ടുള്ള സ്വകാര്യ ആശുപത്രികളില്‍ സൗജന്യ ചികിത്സ ലഭ്യമാകും.
ഇതുവരെ ഇന്ത്യയിലെ എല്ലാ സംസ്ഥാനങ്ങളിലെയും വെല്‍നസ് സെന്ററുകള്‍ തലസ്ഥാന നഗരികളില്‍ മാത്രമാണുള്ളത്.
ഇതു ചരിത്രനേട്ടവും മലബാറിലെ കേന്ദ്ര സര്‍ക്കാര്‍ ജീവനക്കാര്‍ക്കും പെന്‍ഷന്‍കാര്‍ക്കും ആശ്വാസവുമാണെന്ന് എം.പി ചൂണ്ടിക്കാട്ടി.