ചെറുതോണി: തടിയംമ്പാട് ടൗണിനു സമീപം കനത്ത കാറ്റിലും മഴയിലും മരം കടപുഴകി വീണ് ഇടുക്കി-നേര്യമംഗലം സംസ്ഥാന പാതയില്‍ ഗതാഗതം അരമണിക്കൂര്‍ സ്തംഭിച്ചു. ഇന്നലെ ഉച്ചകഴിഞ്ഞ് 3.30 നാണ് സംഭവം.
വാഹനങ്ങള്‍ പാര്‍ക്കു ചെയ്യുന്ന സ്ഥലമായിരുന്നെങ്കിലും സംഭവസമയത്ത് ഇവിടെ വാഹനങ്ങള്‍ ഒന്നുമില്ലായിരുന്നു. ഇലക്ട്രിക് ലൈനിലേക്ക് മരം വീണതിനാല്‍ വൈദ്യുത ബന്ധം തകരാറിലായി. 200 ഇഞ്ച് വണ്ണമുള്ള വന്‍ മരമാണ് റോഡിലേക്ക് വീണത്. ഇടുക്കി ഫയര്‍ സ്റ്റേഷനില്‍ നിന്ന് ലീഡിങ് ഫയര്‍മാന്‍ കെ. സജികുമാറിന്റെ നേതൃത്വത്തില്‍ എത്തിയ സംഘം അരമണിക്കൂറുകൊണ്ടാണ് മരം മുറിച്ചു മാറ്റി ഗതാഗതം പുനസ്ഥാപിച്ചത്. ഇടുക്കി പൊലിസും സ്ഥലത്ത് എത്തിയിരുന്നു.