ചെങ്ങാലൂര്‍ : കുണ്ടുകടവില്‍ ഭാര്യയെ പെട്രോളൊഴിച്ചു തീകൊളുത്തി കൊലപ്പെടുത്താന്‍ ശ്രമം. ഗുരുതരമായി പൊള്ളലേറ്റ യുവതിയെ ചാലക്കുടിയിലെ സ്വകാര്യ ആശുപത്രിയില്‍ പ്രവേശിപ്പിച്ചു. കുണ്ടുകടവ് പയ്യപ്പിള്ളി ബിരാജിന്റെ ഭാര്യ ജീതു (29) നാണു പൊള്ളലേറ്റത്.
ഇന്നലെ ഉച്ചതിരിഞ്ഞു രണ്ടരയോടെയായിരുന്നു സംഭവം. തീകൊളുത്തിയതിനു ശേഷം ബിരാജ് ഓടി രക്ഷപ്പെട്ടു. കുടുംബ വഴക്കിനെ തുടര്‍ന്നു ജീതു കോടാലിയിലുള്ള സ്വന്തം വീട്ടിലാണു താമസിച്ചിരുന്നത്. കുടുംബശ്രീ സംഘത്തില്‍ നിന്നും എടുത്ത വായ്പ തിരിച്ചടക്കാനായി ഇന്നലെ ഉച്ചക്കാണു ജീതു അച്ഛന്റെ കൂടെ കുണ്ടുകടവിലേക്കു എത്തിയത്. കുടുംബശ്രീ യോഗം ചേര്‍ന്ന വീട്ടില്‍ നിന്നു പുറത്തേക്കു ഇറങ്ങുമ്പോള്‍ റോഡില്‍ വെച്ചാണു ബിരാജ് പെട്രോള്‍ ഒഴിച്ചു തീകൊളുത്തിയത്. സംഭവം കണ്ടു ഓടിയെത്തിയ നാട്ടുകാരും ജീതുവിന്റെ അച്ഛനും ചേര്‍ന്നാണു രക്ഷാപ്രവര്‍ത്തനം നടത്തിയത്. എണ്‍പതു ശതമാനത്തിലേറെ പൊള്ളലേറ്റതായി ആശുപത്രി അധികൃതര്‍ അറിയിച്ചു. പുതുക്കാട് പൊലിസ് സ്ഥലത്തെത്തി അന്വേഷണം ആരംഭിച്ചു.