വണ്ടൂര്‍: ഓപ്പണ്‍ സര്‍ട്ടിഫിക്കറ്റ് കോഴ്‌സുകളുടെ പേരില്‍ തട്ടിപ്പ് നടത്തിയ പ്രതിയെ റിമാന്‍ഡ് ചെയ്തു. വെള്ളാമ്പുറം വാളാടന്‍ ശ്രീരാജി (35) നെയാണ് പെരിന്തല്‍മണ്ണ കോടതി റിമാന്‍ഡ് ചെയ്തത്. നാഷണല്‍ ഇന്‍സ്റ്റിറ്റ്യൂട്ട് ഓഫ് ഓപ്പണ്‍ സ്‌കൂളിന്റെ പത്ത്, പന്ത്രണ്ട്, ബിരുദ സര്‍ട്ടിഫിക്കറ്റുകള്‍ നല്‍കാമെന്നു പറഞ്ഞു വിദ്യാര്‍ഥികളില്‍നിന്നു പണംതട്ടിയെന്ന പരാതിയിലാണ് ഇയാളെ അറസ്റ്റ് ചെയ്തിരുന്നത്.
വണ്ടൂരില്‍ ആറു മാസം മുന്‍പു സ്ഥാപനം തുടങ്ങിയ പ്രതി ജില്ലയിലെ മറ്റു സ്ഥലങ്ങളിലും സമാനമായ രീതിയില്‍ തട്ടിപ്പു നടത്തിയതായി വിവരം ലഭിച്ചിട്ടുണ്ട്. റിമാന്‍ഡിലായ പ്രതിയെ കസ്റ്റഡിയില്‍ വാങ്ങി വിശദമായി ചോദ്യംചെയ്യുമെന്ന് എസ്.ഐ അബ്രഹാം പറഞ്ഞു. പണം കൈപറ്റിയതിനു പേരും വിവരങ്ങളും സീലൊന്നുമില്ലാത്ത എസ്റ്റിമേറ്റ് ബില്ലായിരുന്നു ശ്രീരാജ് നല്‍കിയിരുന്നത്.നാല്‍പതിലധികം വിദ്യാര്‍ഥികളില്‍നിന്നു പണം വാങ്ങിയ ഇയാള്‍ ഇരുപതു പേര്‍ക്ക് പണം തിരിച്ചുനല്‍കിയിരുന്നു.