മേപ്പാടി: കിടപ്പിലായ കുട്ടികളുടെ ചങ്ങാതിമാരായി ഇനി ചങ്ങാതിക്കൂട്ടം വീടുകളില്‍ എത്തും.
സമഗ്ര ശിക്ഷാ കേരളയാണ് ചങ്ങാതി കൂട്ടമെന്ന പേരില്‍ പുതിയ പദ്ധതി ആവിഷ്‌കരിച്ചിരിക്കുന്നത്. കിടപ്പിലുള്ള കുട്ടിയുടെ ശാരീരികവും മാനസികവുമായ വളര്‍ച്ച ലക്ഷ്യമിടുന്നതാണ് പദ്ധതി. കുട്ടികളുടെയും അധ്യാപകരുടെയും നിരന്തരമായ സമ്പര്‍ക്കത്തിലൂടെ കിടപ്പിലായ കുട്ടികളുടെ രോഗാവസ്ഥക്ക് മാറ്റം വരുത്താന്‍ കഴിയുമെന്നാണ് അധികൃതര്‍ പറയുന്നത്. ജില്ലയില്‍ ആകെ 210 കുട്ടികള്‍ ഭിന്നശേഷിക്കാരായി വീടുകളില്‍ കിടപ്പിലുണ്ട്. കിടപ്പിലുള്ള കുട്ടിയുടെ പരിധിയിലെ സ്‌കൂള്‍ കുട്ടിയെ ദത്തെടുക്കുന്നതാണ് പദ്ധതി. പദ്ധതിയുടെ ജില്ലാതല ട്രൈ ഔട്ട് മേപ്പാടി കുന്നംമ്പറ്റയില്‍ നടന്നു.
മുഹമ്മദ് അഫ്‌ലഹ് എന്ന കുട്ടിയെ കോട്ടനാട് ഗവ. യു.പി സ്‌കൂള്‍ ഏറ്റെടുത്തു കൊണ്ട് പദ്ധതിക്ക് തുടക്കമായി. ആഴ്ച്ചയില്‍ നിശ്ചിത ദിവസം ചങ്ങാതിക്കൂട്ടം വീടുകളില്‍ എത്തും. കുട്ടിയുമായി കളി ചിരികളില്‍ ഏര്‍പെടുന്നതോടെ കുട്ടിയുടെ ശാരീരിക മാനസിക വളര്‍ച്ച സംഭവിക്കുമെന്ന് ഐ.ഇ.ഡി.സി പ്രോഗ്രാം ഓഫിസര്‍ പ്രമോദ് പറഞ്ഞു. ജില്ലയില്ല എല്ലാ പൊതുവിദ്യാലയങ്ങള്‍ക്കു കീഴിലും ചങ്ങാതിക്കൂട്ടം രൂപീകരിക്കാനുള്ള ഒരുക്കത്തിലാണ് സമഗ്ര ശിക്ഷ കേരളം.
പരിപാടി വാര്‍ഡ് മെംബര്‍ പ്രതീജ പ്രതീപ് ഉദ്ഘാടനം ചെയ്തു. എസ്.എസ്.എ ജില്ലാ പ്രോഗ്രാം ഓഫിസര്‍ ബാബുരാജ്, വൈത്തിരി ബി.പി.ഒ ശിബു, പി.ടി.എ പ്രസിഡന്റ് ഇല്ല്യാസ്, പ്രധാന അധ്യാപിക ടി.ടി ശോഭന, എസ്.എം.സി ചെയര്‍മാന്‍ സുരേഷ് ബാബു സംസാരിച്ചു.